Tenderi i mirëmbajtjes së Godinës së Spitalit ‘Nënë Tereza’ është goditja e radhës e Blendi Gonxhes. Ky është skandal që mban vulën përfundimtare nga Operatori i Blerjeve të Përqendruara në varësi të ministrit të Ekonomisë, Blendi Gonxhe.
Veprimi do t’u kushtojë taksapaguesve 1.2 milionë euro dhe gjithçka është bërë përmes tenderit me objekt “Shërbim mirëmbajtje objekti ndërtimor për Qendrën Spitalore Universitare ‘Nënë Tereza” Burimi i financimit, sipas dokumenteve të tenderit, është buxheti i shtetit.
Sipas preventivit do të ndërhyhet me izolim çatie, apo risovatime në ato godina ku ka nevojë, por pa përcaktuar specifikisht se cila ka këtë nevojë për ndërhyrje dhe çfarë punimesh do të bëhen në secilën godinë. Megjithatë komisioni i tenderit ka pasur në dorë një tabelë preventivi që justifikon në letër shpenzimet për dy vjet.
Gjithsesi sipas llogarive të drejtoreshës së QSUT, Alma Cani, që i janë dërguar Operatorit në varësi të Gonxhes, mirëmbajta e godinave do të kushtojë 1.2 milionë euro.
Me këto metoda dhe mungese qartësie krijohen hapësira për abuzime, sepse do merret një fond i madh nga buxheti i shtetit.
Ndërkohë pas shqyrtimit të dokumenteve, shohim që abuzimi është më thellë se kaq! Kjo kontratë 1.2 milionë euro po i dhurohet biznesmenit Ferdinand Çaushi. Gjatë procedurës janë dorëzuar 10 oferta me vlera të ndryshme për këtë prokurim, por prej kompanive janë skualifikuar nga gara në fazën e parë të prokurimit me argumentin se nuk kanë paraqitur dëshmi që disponojnë punëtor të kualifikuar, apo kamionë për transportin e inerteve.
Mes këtyre firmave është skualifikuar edhe R & T” sh.p.k. & “Inteligent Building Solution” , e cila kishte ofertën më ekonomike, 73,644,891 lekë.
E megjithatë kompania u skualifikua pasi nuk kishte paraqitur dokumentet që vërtetojë se ka “punonjës për shërbimin e shëndetit dhe sigurisë në punë”.
Këto janë kritere të nevojshme sidomos për punë të tilla, por komisioni i tenderit mund ta kishte bërë një komunikim dhe të plotësohej mangësia. Sepse në këtë mënyrë mund të kursehej fondi limit me të paktën 500 milionë lekë.
Në fazën e fundit, vetëm një zarf me ofertë mbeti mbi tavolinën e administratores së OBP, Arlinda Pogaj, që jep llogari drejtpërsëdrejti tek ministri Blendi Gonxhe. Kështu, kaloi vetëm oferta e ”INA” SHPK, e cila nuk pati asnjë konkurrent përballë edhe e përfitoi kontratën pa garë.
Për këtë shkelje, Open Data Albania i ka vendosur “Flamurin e kuq”. Kjo është shenja e riskut të korrupsionit për këtë kontratë.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post