Në nëntor 2023, administratori i OSSH, Blendian Dalipi ka firmosur tenderin me objekt “Shërbimi i pastrimit dhe dezinfektimit për objektet e OSSH sh.a dhe objektet në administrim të FSHU sh.a”. Fondi limit 322 milionë lekë është planifikuar nga Dalipi për të vrarë mushkonjat dhe mizat që bezdisin elektricistët në selinë e tyre.
Nuk i kishte mbetur punë tjetër për të bërë drejtorit të përkëdhelur të Belinda Ballukut, por vetëm të vrasë mizat. Për këtë punë që mund ta zgjidhin vetë personeli dhe sanitaret, Dalipi vendosi ta bëjë gurgule kombëtare. Në fakt, jemi të sigurt se ky aksion i shtrenjtë për vrasjen e mizave ka prapa një përvetësim gjigant të fondit.
Në faqen e OPEN DATA shohim që valëvitet ‘Flamuri i Kuq’ në krah të këtij prokurimi. Është shenja e riskut të korrupsionit. Tenderi nuk kishte konkurrencë dhe gjithçka ishte e paracaktuar sipas interesit të administratorit Dalipi.
Në fakt për këtë tender fillimisht kanë paraqitur ofertat e tyre 3 kompani, por siç ndodh rëndomë, Dalipi i ka skualifikuar që në fazën e parë dhe pasi eliminoi konkurrencën, kontrata iu dhurua firmës “CLEAN FAST” sh.p.k.
Janë 322 milionë lekë që dalin nga Thesari i Shtetit dhe paguhen për vrasje mizash nga korporata që është zhytur në borxhe dhe paguhet me tarifat dhe taksat e qytetarëve.
Këto lekë i donte për kompaninë e tij edhe Arbër Abazi, nipi i biznesmenit dhe eksponentit të PS-së, Sadri Abazi. Ky është mësuar që të përfitojë çdo tender që i vë gishtin. Megjithatë, zemërimi i tij shërben në këtë rast sepse zbulon para publikut prapaskenën e tenderit të Dalipit.
Më datë 30 nëntor 2023, pranë Komisionit të Prokurimit Publik, është administruar ankimi nga bashkimi i operatorëve “Air” SHPK dhe “Silver” SHPK si dhe kompania “Alko Impex Construction” SHPK (me pronar Arbër Abazin), pjesëmarrës në procedurën e mësipërme të prokurimit. Këta operatorë u skualifikuan nga Dalipi, edhe pse njëri prej tyre kishte ofertë dukshëm më të ulët se sa fituesi.
Të dy grupet denoncuese pretendojnë se kompania e shpallur fituese nuk plotëson dy kritere të rëndësishme, ku një prej tyre është se nuk ka paguar taksat vendore dhe tjetri nuk përmbush kriterin për raportim e xhiros vjetore.
“Në lidhje me kualifikimin e kundërligjshëm të OE “Clean Fast” SHPK, ky OE nuk plotëson kriterin e kualifikimit në lidhje me pikën 2.2.1 të kritereve të kualifikimit për xhiron vjetore, pikën 2.2.3 për pagesën e detyrimeve të taksave vendore, pikën 2.3.1 për kontratat e ngjashme dhe pikën 2.3.2 për numrin e punonjësve dhe dokumentacionin shoqërues”, thuhet në ankesë.
Këtë gjë në fakt mund ta vërtetojë edhe tabela më poshtë, ku duket që “Clean Fast” ka raportuar xhiron vjetore që në vitin 2021, pra 2 vitet e tjera jo!
Edhe pse gjatë shqyrtimit, KPP vlerësoi se pretendimet e ankimuesve qëndrojnë, sërish vendosi të pranojë vetëm pjesërisht ankesat lidhur me këtë tender. Kështu, me butësi KPP i kërkon Dalipit që të rishikojë edhe njëherë arsyet e skualifikimit të ofertës së paraqitur nga bashkimi i operatorëve Air” SHPK & “Silver” SHPK. Kjo do të thotë se diçka që nuk shkon është vërejtur në atë procedurë, por KPP po e kalon pa bërë zhurmë.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post