Kreu i OSSH, Blendian Dalipi, është drejtor i fuqishëm brenda korporatës OSHEE dhe këtë e tregon arroganca me të cilën i shkel rregullat e prokurimit. Në tenderët e firmosur nga Dalipi valvitet “Flamuri i kuq” i abuzimeve të qindra milionë lekëve.
Kësaj radhe, Dalipi i ka dhënë kontratën 700 milionë lekë njërit prej oligarkëve më të mëdhenj, Shpëtim Cingës, pronarit të firmës SHANSI INVEST. Ky tender mban numrin e referencës REF-92165-12-27-2023 dhe ka si objekt “Ndërtimi i Fiderave 20 Kv,L10,n.St. Vlora 1 dhe Fideri J10 N.St. Vlora 2 për furnizimin e objekteve në Portin e Vlorës”.
Menjëherë sapo shikon dokumentet e tenderit, kuptohet që kemi të bëjmë me një tjetër rast abuzimi, me taktikat e vjetra të përvetësimi, që sjellin si pasojë dëm ekonomik. Në dokument renditen 4 oferta të paraqitura nga 4 kompani të ndryshme, me vlera të ndryshme.
Nga të gjitha këto oferta, Dalipi tërhoqi zarfin “SHANSI INVEST” të Shpëtim Cingës, që regjistron vlerën më të lartë. Propozimi i tij është afro 100 milionë lekë më shumë se të tjerët, por Dalipi preferon ofertat e shtrenjta. Pra, ndonëse tre firmat e tjera ofruan më pak, Blendian Dalipi i ka dhënë dhuratën, Shpëtim Cingës, me ofertë në vlerën 700 milionë lekë të vjetra. Nga ana tjetër nëse krahasojmë këtë vlerë me fondin limit, del se është sa 93% e tij.
Me këtë lloj tenderi, që duhej anuluar, Dalipi sfidon SPAK-un ta hetojë. Ndërkohë, Open Data e ka vlerësuar këtë tender me “Flamur të kuq”, që sinjalizon riskun e korrupsionit.
Biznesmeni Shpëtim Cinga njihet për gamën e tenderëve që përfiton me vlera të larta, sidomos nga sektori energjetik. Ai fitoi miliarda lekë kryesisht nga aferat me KESH, gjatë këtyre viteve që drejtohej nga Ergys Verdho, e më parë nga Benet Beci.
Vetëm në vitet e fundit firma e tij numëron 14 miliardë lekë transaksione nga Thesari i Shtetit përmes tenderëve, shumica e të cilëve të fituar me ndihmën e drejtorëve të korruptuar. Ku shihet se pjesa më e madhe janë nga sektori i energjisë, si aferat me KESH, OST, OSSH, OSHEE, ndërsa nuk mungojnë edhe kontratat që ka firmosur me kryetarin e bashkisë Tiranë, Erion Veliajn.
Madje, shohim që këtë vit ai e ka nisur me dy tenderë nga Bashkia Tiranë: njëri ka fondin prej 295 milionë lekë, tjetri i firmosur nga UKT është transaksion 380 milionë lekë.
Me firmën e Dalipit, “SHANSI INVEST” përfitoi kontratën 100 milionë lekë më shtrenjtë dhe ky është një dëm më arkën e shoqërisë.
Dalipi u emërua para një viti në krye të OSSH dhe njihet për përkrahjen që gëzon nga ministrja Belinda Balluku. Megjithatë, kujtojmë se shumë drejtorë, kohët e fundit kanë përfunduar në pranga për tendera fiktivë dhe korrupsion me koncesionet, megjithëse kanë pasur mbështetje politike nga shefat.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post