Bashkisë Vorë nuk i ndahen drejtuesit e korruptuar që po e çojnë atë drejtë degradimit. Pas ish-kreut Agim Kajmaku, i arrestuar për përfshirje në grupe kriminale dhe i denoncuar për abuzimet me fondet e bashkisë, edhe drejtuesi i ri Blerim Shera po ndjek të njëjtat hapa. Ai po bën pis bashkinë me aferat korruptive për pastrim. Kemi të bëjmë me 2 tenderë me vlerë totale 4 miliardë lekë, të cilët Shera i ka dhënë pa konkurrencë dhe në shkelje të ligjit. Ky prokurim me numër reference është hapur si një kontratë “urgjente”, pa argumentuar shkaqet.
Bie në sy se ai po shpenzon një vlerë shumë të lartë dhe tenderi i është dhënë pa garë kompanisë “Kurora” shpk. Në fakt ky tender është edhe më i komplikuar se kaq dhe afera akoma më e thellë. Pasi, brenda 2 muajsh Shera i ka dhënë kësaj kompanie tender me të njëjtin objekt, por i ka ndryshuar afatet. Konkretisht, nga dokumentet e siguruara evidentohet se, në gusht të këtij viti mbylli tenderin për pastrim me vlerë 3 miliardë lekë dhe fitues u shpall kompania “Kurora”, pa garë dhe duke cenuar konkurrencën. Në këtë tender morën pjesë “Alko Impex” me vlerë 266.880.370 lekë pa TVSH. B.O.E Cogren & A.E.K&Co me vlerë të ofertës 239.981.138 lekë, ED Konstruksion me vlerë 273.395.778 lekë. Ndërkohë, fituesi B.O.E Kurora & V.A.L.E Recycling ofruan 270.866.703 lekë, ndërkohë firma REJ kishte një ofertë me vlerë 240.582.685 lekë.
Siç duket edhe nga ofertat, ato që ofruan më pak se Kurora, u s’kualifikuan. U përdorën argumente se nuk janë paraqitur autorizime prodhuesi për dezinfektimin e kontejnerëve, apo nuk kanë paraqitur dokumente për mjetet. Ndërkohë, firma REJ, sipas Bashkisë së Vorës, nuk ka pasur asnjë dokument që disponon mjetet, ndërsa “Alko Impex” s’ka pasur drejtues teknik. Paratë shkuan në llgaritë e Elvis Miri, pronarit të “V.A.L.E. Recycling” dhe Servet Dedjes që zotëron 100 % të kompanisë “Kurora” Shpk.
Shera i jep klientit “thelën mbi bisht”
Me tenderin e mbyllur në 16 shtator 2022, Shera përshpejtoi procedurat për objektin në fjalë. Por, edhe për këtë tender Shera ka derdhur 220 milionë lekë të tjera, duke bërë që vetëm për pastrim të shpenzohen në total rreth 4 miliardë lekë. E qartë që, kjo është një aferë e dyshimtë, pasi për rreth 30 ditë, e njëjta firmë shpallet fillimisht fituese e tenderit të madh dhe pas disa ditësh fiton një tjetër tender pastrimi emergjent për 90 ditë. Kjo është “thela mbi bisht” për mikun e tij. Duhet theksuar këtu se kontrata e fundit është procedurë me negocim dhe nuk është zhvilluar asnjë garë duke shkelur këtu dy rregulla të rëndësishme të prokurimeve publike.
Shera nuk pyet as për shefin
Dy tenderë me të njëjtin objekt në pak javë sigurisht që është rast për t’u hetuar nga SPAK-u. Por Shera nuk pyet për asgjë dhe asnjë. Ai ka “guxuar” të shpenzojë miliarda lekë me tenderë abuziv edhe pse bashkia Vorë ka qenë nën shënjestrën e kryeministrit Edi Rama për çështjen e administrimit. Kujtojmë se në një mbledhje me krerët e bashkive në vend, kryeministri paralajmëroi bashkinë e Vorës se duhet të marrë masa për të rregulluar shpenzimet pasi është në gjendje kritike sa i përket borxheve. “Situata në Bashkinë e Kavajës dhe të Vorës është shumë më serioze ku detyrimet e prapambetura shënojnë respektivisht 91.23% dhe 90.54%”, u shpreh Rama. Por me këto veprime, kryebashkiakut Shera nuk i bën punë më mbrojtja apo kritikat për sy e faqe të Ramës, sepse po shkon me këmbët e tij drejt SPAK-ut. Zyrtari e ka bërë tashmë pis imazhin dhe po ia lë bosh portofolin qytetit./ Esmeralda Hida/
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post