Departamenti Amerikan i Shtetit ka uruar Shqipërinë për festën e Pavarësisë.
Sekretari i Shtetit Antony Blinken, shprehet krenar që ka një aleat si vendi ynë, teksa e bën të qartë se do të vijojë të asistojë që reformat të ecin përpara, sidomos ajo në sistemin e drejtësisë.
“Në emër të Shteteve të Bashkuara të Amerikës, uroj qeverinë dhe popullin e Shqipërisë dhe ju uroj një festë të gëzuar për 111-vjetorin e Pavarësisë. Shtetet e Bashkuara janë krenare që punojnë me ju si aleatë dhe partnerë të NATO-s të angazhuar për të forcuar përpjekjet e Shqipërisë për reformën në drejtësi, për të çuar më tej bashkëpunimin tonë për sigurinë kibernetike dhe për të vazhduar mbështetjen tonë të palëkundur për Ukrainën përballë luftës së agresionit të Rusisë. Ne ju falënderojmë për mirëpritjen tuaj bujare dhe me zemër të hapur të afganëve dhe mbështesim fuqishëm integrimin tuaj të plotë në komunitetin euroatlantik, veçanërisht përmes përparimit në reformat e sundimit të ligjit dhe drejt anëtarësimit në Bashkimin Evropian”, shprehet Blinken.
Më tej bëhet e ditur se zgjedhja e fundit e Shqipërisë në Këshillin e OKB-së për të Drejtat e Njeriut është një shenjë respekti ndërkombëtar për përparimin e fuqishëm që ka bërë kombi shqiptar në dekadat e fundit dhe një njohje e shërbimit të tij shembullor në 2015-2017.
“Ne jemi krenarë që shërbejmë përkrah Shqipërisë dhe presim me padurim të punojmë së bashku për të promovuar dhe mbrojtur të drejtat e njeriut në mbarë botën. Lidhjet midis kombeve tona, të bazuara në vlerat, kulturën dhe miqësinë e përbashkët mbeten të qëndrueshme. Le të vazhdojë të përparojë puna jonë së bashku”, vijon ai.
Shqipëria kremton sot 111 vjetorin e Pavarësisë, teksa pati një sërë aktivitetesh në Tiranë dhe në Vlorë. Për të festuar Ditën e Pavarësisë erdhi në Vlorë dhe kryeministri i Kosovës, Albin Kurti.
Discussion about this post