Sekretari amerikan i Shtetit Antony Blinken ka reaguar pasi gjykatësit e Kombeve të Bashkuara vendosën të martën të lënë në fuqi dënimin me burgim të përjetshëm për ish-komandantin ushtarak të serbëve të Bosnjës, Ratko Mladiç.
Në një postim në Tëitter, Blinken shprehet se shpreson që vendimi i sotëm mund t’u sjellë paqe viktimave dhe familjarëve të tyre.
Ai thekson se SHBA do të vijojë të ngrejë zërin për drejtësi dhe përgjegjësi.
I cilësuar si “kasapi i Bosnjës”, Mladiç u dënua në nëntor të vitit 2017 nën akuzat që përfshinin vrasjen e mbi 8 mijë djemve e burrave në korrik të vitit 1995 në Srebrenicë, ndër mizoritë më të rënda në Evropë që nga përfundimi i Luftës së Dytë Botërore. Masakra u krye në një zonë që ishte shpallur e mbrojtur nga Kombet e Bashkuara.
