Disa javë para zgjedhjeve kombëtare, peizazhi politik i Shqipërisë u trondit nga arrestimi muajin e kaluar i kryebashkiakut të Tiranës, Erion Veliaj.
Prej kohësh i konsideruar një aleat i ngushtë dhe një pasardhës i mundshëm i kryeministrit Edi Rama, Veliaj u përfshi në një skandal korrupsioni, mes akuzave për kontrata publike të orientuara drejt bashkëpunëtorëve të tij dhe shpenzimeve prej qindra mijëra eurosh për mallra luksoze. Ky hetim mund të shënojë fundin e karrierës politike të Veliajt, i cili ka mohuar çdo akuzë, vetëm pak muaj para zgjedhjeve parlamentare të Shqipërisë në maj.
Në qendër të hetimit që po zhvillohet qëndron Zyra e Prokurorisë së Posaçme (SPAK), një institucion i mbështetur nga Shtetet e Bashkuara dhe Bashkimi Evropian për të luftuar korrupsionin endemik në këtë vend të Adriatikut. SPAK është bërë një element kyç në aspiratat e Shqipërisë për anëtarësim në BE, duke ndjekur me vendosmëri mandatin e saj për çmontimin e strukturave të korruptuara dhe rrjeteve të krimit të organizuar që prej kohësh kanë ndikuar sistemin politik dhe ekonomik të vendit.
Rama, i cili ka shpallur integrimin evropian si gurin themeltar të trashëgimisë së tij politike, ka qenë prej kohësh një mbështetës i fuqishëm i punës së SPAK. Megjithatë, që nga momenti kur hetimet u përqendruan tek një bashkëpunëtor i tij i afërt, retorika e tij ka ndryshuar. Ndërsa ai këmbëngul se Partia Socialiste nuk do të ndërhyjë, ka akuzuar prokurorët për tejkalim të kompetencave dhe mungesë përgjegjshmërie, duke e cilësuar aktakuzën ndaj Veliajt si një “roman prej 400 faqesh.”
Duke qenë se pozicioni i Shqipërisë ndaj Perëndimit është në lojë, Rama nuk jep asnjë shenjë të moderimit të sulmeve të tij. Ditët e fundit, ai ka sulmuar ashpër SPAK-un—madje, në një video tashmë virale, shihet duke goditur tavolinën me grushta—duke paralajmëruar njëkohësisht që hetimet të mos shënjestrojnë edhe atë vetë.
“Kjo është shumë serioze! Shumë serioze! Shumë serioze!”, u tha ai deputetëve në një mbledhje të partisë. “Më mirë të mos bëjnë gabimin të më kërkojnë telefonin, sepse kanë mjaftueshëm materiale tashmë.”
Partia Socialiste e Ramës është rreshtuar plotësisht në mbrojtje të Veliajt, duke e paraqitur çështjen si një përpjekje për të dobësuar qeverinë përpara zgjedhjeve të 11 majit. Zyrtarët e partisë kanë përsëritur kritikat e Ramës ndaj SPAK, duke argumentuar se hetimet synojnë në mënyrë disproporcionale figurat e mazhorancës, ndërsa injorojnë aktorët e tjerë politikë. Nga ana tjetër, partitë opozitare kanë shfrytëzuar këtë skandal, duke e cilësuar atë si një dëshmi të qartë të korrupsionit brenda radhëve të socialistëve.
Ndërkohë, Bashkimi Evropian ka riafirmuar mbështetjen për SPAK, duke e cilësuar atë si një element kyç të rrugëtimit të Shqipërisë drejt anëtarësimit në BE. “Reforma në drejtësi dhe krijimi i SPAK janë gurë themeli të procesit të integrimit të Shqipërisë në Bashkimin Evropian,” deklaroi këtë javë delegacioni i BE-së në Shqipëri.
Kreu i SPAK, Altin Dumani, hodhi poshtë akuzat për motive politike, duke theksuar se ata që veprojnë në përputhje me Kushtetutën “nuk kanë asgjë për t’u frikësuar.” Përkundrazi, ai la të kuptohet se hetimi mund të zgjerohet më tej, duke theksuar se SPAK ka juridiksion mbi krimet zgjedhore.
Një zhvillim i tillë mund të përshkallëzojë më tej situatën-dhe të krijojë sfida të reja për Shqipërinë në përpjekjet e saj për t’u anëtarësuar në BE.
/Përshtatur nga bloomberg.com/
Discussion about this post