Sekretari i Përgjithshëm i Partisë së Lirisë, Tedi Blushi, në një deklaratë për mediat dje, është shprehur se 93% e shqiptarëve mendojnë se pensionet në Shqipëri janë të pamjaftueshme. Blushi theksoi se sipas sondazhit më të fundit nga Këshilli i Bashkëpunimit Rajonal, 74% e qytetarëve janë të pakënaqur me kujdesin ndaj të moshuarve. “Pensionistët shqiptarë sot janë më të varfër edhe se në vitin 2013 kur “Rilindja” erdhi në pushtet”, tha ai.
Sipas tij, Qeveria i ka borxh secilit pensionist në qytet mesatarisht 104 Euro ne muaj, ose 1248 Euro në vit, ndërsa secilit pensionist në fshat mesatarisht 42 Euro, ose 504 Euro në vit. Po ashtu ai parashtroi edhe programin e Partisë së Lirisë, për të dyfishuar masën e pensioneve dhe te barazoje atë me mesataren e vendeve te rajonit. “Partia e Lirisë në qeverisje do të bëjë të mundur: Indeksimin e plotë të masës së pensioneve duke e llogaritur indeksimin mbi bazën e inflacionit të artikujve ushqimorë; Indeksimin e shpeshtë brenda vitit të masës së pensioneve në rastet e krizave apo pandemive për shkak të rritjes së shpejtë të çmimeve; Dyfishimin e pensioneve me nivelin e rritjes reale ekonomike për ta bërë rritjen ekonomike gjithëpërfshirëse.
Ne angazhohemi për: Mbulimin e plotë financiar të të gjithë barnave, që përdoren nga pensionistet dhe të përshkruara me recetë mjekësore. Mbulimin e të gjitha shërbimeve mjekësore dhe të infermierisë në banesë për të pensionistët me probleme shëndetësore. Dhënien e shërbimit mjekësor me prioritet për pensionistët për evitimin e pritjeve të gjata në qendra shëndetësore apo spitale. Sigurimin e shërbimeve mjekësore pa pagesë për rehabilitimin dhe fizioterapinë për pensionistët me sëmundje invalidizuese. Sigurimin pa pagesë të materialeve mjekësore të trajtimit të pacienteve pensionistë në banesë si dhe artikujve mjekësore, që mundësojnë lëvizjen dhe pavarësimin jetësor të pensionistëve”, deklaroi Blushi.
Discussion about this post