Deputeti i Partise se Lirise Tedi Blushi ka ngritur akuza të forta në drejtim të sistemit të drejtësisë dhe Prokurorisë, duke e cilësuar paraburgimin si një nga padrejtësitë më të mëdha që po ndodhin sot në Shqipëri.
“Burgjet janë mbushur me të pafajshëm, ndërsa kriminelët janë të lirë,” – deklaroi Blushi ne Komisionin e Ligjeve ne seancen e pyetjeve per Kreun e SPAK, Z. Altin Dumani. Ai denoncoi se qytetarët po dënohen për çështje të vogla, ndërkohë që trafikantët dhe zyrtarët e korruptuar vazhdojnë aktivitetin e tyre pa u prekur nga ligji.
“Sot dënohesh për 1 cigare hashash, por jo për 1 maune me drogë. Dënohesh për një kotec pa leje, por jo për një kullë pa leje,” – theksoi Blushi.
Sipas tij, mbipopullimi i burgjeve është dëshmi e një shteti represiv dhe policor, i cili godet më të dobtit dhe i shërben të fortëve. Ai theksoi se rreth 2/3 e personave në burgje janë të paraburgosur, dhe 1/3 e tyre janë ende pa një akt-akuzë, një shifër që e kalon gati trefish mesataren e Bashkimit Europian.
Blushi akuzoi se kërkesat e Prokurorisë për arrest me burg në raste të parëndësishme, si lidhja e paligjshme e energjisë elektrike, kanë pasur pasoja tragjike, përfshirë edhe vetëvrasje brenda burgjeve.
“A ndiheni fajtor, z. Kryeprokuror, që i keni shërbyer instalimit të një regjimi represiv?”, – ishte pyetja e drejtpërdrejtë që Blushi i drejtoi Prokurorit të Përgjithshëm.
Blushi shtroi edhe pyetje të tjera lidhur me rolin e Prokurorisë, rritjen e kriminalitetit dhe korrupsionit, si dhe presionet politike dhe diplomatike në punën e hetuesve.
Ai përmendi gjithashtu dhe rolin e Prokurorisë në kuadër të “Task Forcës” për zgjedhjet e 11 majit, duke kërkuar transparencë mbi masat konkrete për parandalimin e krimeve zgjedhore.
Discussion about this post