Një debat i ashpër është zhvilluar sot në Komisionin Parlamentar të Ligjeve mes anëtarit të opozitës, Tedi Blushi, dhe kreut të Inspektoratit të Lartë të Drejtësisë (ILD), Artur Metani. Blushi ngriti një sërë akuzash serioze dhe pyetjesh të drejtpërdrejta lidhur me integritetin dhe veprimtarinë e Metanit në krye të ILD-së, duke vënë në pikëpyetje pavarësinë e këtij institucioni.
Blushi e akuzoi Metanin për konflikt interesi dhe mungesë të pavarësisë, duke kujtuar se ai ka qenë ish-Drejtor i Departamentit Juridik në qeverinë e Edi Ramës. “Aktet dhe vendimet që keni firmosur si pjesë e qeverisë, sot ose janë në hetim ose kanë çuar në dënime. Si mund të hetojë një gjyqtar një akt që ju vetë e keni firmosur?”, pyeti Blushi.
Deputeti i opozitës solli në vëmendje faturën prej rreth 40 milionë eurosh që Shqipëria ka paguar për vendime të padrejta të rrëzuara nga Gjykata e Strasburgut. Ai kërkoi që gjyqtarët përgjegjës të mbajnë përgjegjësi financiare, jo qytetarët.
Blushi kërkoi përgjigje nëse ILD ka ndërmarrë ndonjë procedim disiplinor ndaj gjyqtarëve si Irena Maneku, Gjoka, Shpata, për fshehje të dënimeve penale në shtete të tjera, konkretisht në Greqi. Ai theksoi se ndonëse verifikimet për një prej tyre janë premtuar prej më shumë se një viti, nuk ka ende asnjë rezultat.
Blushi e akuzoi Metanin se ka pasur një rol në këtë aferë dhe ngriti shqetësimin nëse kjo ndikon në punën e prokurorëve dhe gjyqtarëve që po hetojnë çështjen. “A ndihen nën presion nga ju?”, e pyeti ai drejtpërdrejt.
Ai kërkoi emrat e prokurorëve të SPAK që, sipas tij, shkelin ligjin dhe mbeten të paprekur nga ILD, duke e akuzuar Metanin për mbrojtje selektive dhe mungesë transparence.
“Ju folët për dilema universale, por nuk dhatë asnjë përgjigje konkrete për çështje që shqetësojnë çdo shqiptar,” përfundoi Blushi, duke e akuzuar drejtësinë aktuale për certifikim të paligjshmërisë dhe pandëshkueshmërisë.
Discussion about this post