Deputeti i PD, Luçiano Boçi ka komentuar krizën brenda PD dhe vendimet e marra për pezullimin dhe përjashtimin e disa prej figurave kryesore të partisë. Boçi tha se situata kishte ardhur në një pikë të vështirë aq sa ishte nxitur një atmosferë “lufte” për shkak se nuk ishin ndjekur mekanizmat politikë për t’u përballur me këtë krizë.
Sa i përket mungesës së pezullimit apo të përjashtimit ndaj tij, Boçi tha se i vetmi sqarim mund të ishte fakti që nuk bënte pjesë as në Komisionin e ngritur nga Berisha dhe as nuk kishte post drejtuesi politik në ndonjë qark të caktuar. Gjithsesi Boçi shtoi se këto vendime të ndërmarra nga Basha nuk i njihnin dhe nuk i pranonin si të tilla.
“Nuk kam ndonjë emocion të veçantë ndaj këtij fakti jam neutral. Në momentin që e kam marrë detyrën dhe funksionin nuk kam pasur ndonjë emocion. Por për sqarim, aty janë përjashtuar anëtarët e Komisionit të Rithemelimit dhe drejtues politik të qarqeve dhe unë nuk kam asnjërin prej këtyre posteve. Kjo është arsyeja formale dhe kështu mendoj unë se është vepruar sepse unë nuk jam pjesë e vendimmarrjes dhe nuk marr pjesë në asnjë mbledhje. Prej dy muajsh nuk më vjen asnjë lloj njoftimi dhe madje edhe na janë mbyllur portat kur kam shkuar të hyj në seli megjithëse me vete kemi pozicionin politik dhe atë të deputetit”, tha Boçi.
I pyetur sesi mund të zgjidhej kriza që ka kapluar partinë Demokratike, deputeti demokrat u shpreh se e vetmja gjë që po kërkohej ishte nisja e një procesi zgjedhor brenda partisë deri në muajin mars dhe më pas vendimi të merrej me votë nga anëtarësia.
Discussion about this post