Ish-sulmuesi i Kombëtares, Erjon Bogdani ka analizuar situatën në përfaqësuesen shqiptare pas përfundimit të fushatës kualifikuese në kampionatin Botëror. Ai ka theksuar se trajneri Edi Reja është brenda objektivave ndërsa shpjegoi se çfare duhet të ndryshojë në skuadër.
“Mendoj se gotën duhet ta shohim gjysmë plot. Para eliminatoreve thamë që llogaritë do t’i bënim kundër Polonisë e Hungarisë. Mos harrojmë që Hungaria luajti shumë mirë në Europian dhe është një nga skuadrat që ka marrë pjesë në Europianët e fundit radhazi. Ka bërë paraqitje shumë të mirë me ekipe si Gjermania, Franca e Portugalia. Ishte skuadër e fortë, ne morëm 6 pikë dhe për mendimin tim, ishte një rrugëtim i kombëtares pozitiv dhe vendi i tretë ishte një gjë shumë pozitive për ekipin kombëtar.
Kemi Gjasulën, Brojën e Cikalleshin, me këtë shtatëlartësi që kemi nuk na falet që kemi pësuar gola me goditje standarte e shënuar pak. Është diçka kryesore që duhet ta përmirësojmë se pavarësisht një ndeshje e luan mirë apo jo, mund të penalizohesh apo marrësh gjëra pozitive në goditjet standarte.
Mendoj që deri tani, nga objektivat që kishim, ishim brenda objektivave tonë. Varet si do të jetë bashkëpunimi, a do qëndrojë apo federata do të shohë ndonjë trajner që këtë punë ta shtyjë më para. E kanë ato në dorë, por mendoj se objektivi ishte vendi i tretë. Normalisht kishte ndonjë gjë si ndeshjet në transfertë ku kishte gjëra që mund të bënim më mirë, por them se këto 18 pikë ishin të bëra mirë. Por edhe pikët me Hungarinë, ishin gjë pozitive se Hungaria ka lojtarë të mirë dhe ka marrë pjesë në Europian.
Dukë parë ndeshjet nga larg, Broja është një lojtar shumë i ri, me shumë perspektivë dhe mendoj se me atë që ka treguar në fushën e lojës jo vetëm me kombëtaren por edhe me ekipin, se është i ri në Premier Ligë që është ëndërr për çdo lojtar, mendoj që vlerat e tij nuk diskutohen”, përfundoi ish-futbollisti i Kombëtares, Erjon Bogdani.
Discussion about this post