Kreu i diplomacisë evropiane, Josep Borrell tha se Bashkimi Evropian e quan të mbyllur incidentin e nëndetëseve, ndërsa shprehu në Uashington gatishmërinë e tij për të kthyer faqe në lidhje me krizën franko-amerikane që ftohu marrëdhëniet midis SHBA-së dhe Brukselit, duke mirëpritur bashkëpunimin transatlantik të përforcuar.
“Ne nuk do të tregohemi mazokistë dhe nuk do të këmbëngulim sërish e sërish në problemet tona. Ne duhet t’i kapërcejmë ato dhe të shikojmë drejt së ardhmes”, tha ai për gazetarët, pas takimit me homologun e tij amerikan, Antony Blinken.
“Ndodhi një incident, pati disa keqkuptime, kishte mungesë komunikimi, e gjithë kjo tashmë është thënë”, vuri në dukje ai.
“Gjithçka është mirë, mbaroi, le të vazhdojmë më tej. Dhe le të fillojmë të punojmë së bashku më ngushtë”, shtoi Borrell.
Në shtator, Borrell shprehu “solidaritetin” e Bashkimit Evropian me Francën në krizën e paparë që e vuri atë kundër me SHBA-në.
Në fjalë, njoftimi nga presidenti amerikan, Joe Biden, i një aleance të re në rajonin Indo-Paqësor me Australinë dhe Britaninë e Madhe, prishi një megakontratë për nëndetëset midis midis Parisit dhe Kanberrës.
Autoritetet franceze denoncuan një “goditje pas shpine” dhe një “shkelje të besimit”.
Presidenti Biden dhe homologu i tij francez, Emmanuel Macron, më në fund kanë arritur një marrëveshje, në përpjekje për të rikthyer besimin mes dy vendeve.
