Përfaqësuesi i lartë i Bashkimit Evropian për politikë të jashtme dhe siguri, Josep Borrell ka konfirmuar se javën tjetër do mbahet një takim krize në mes të Kosovës e Serbisë. Ndonëse nuk e ka precizuar gjatë fjalimit, bëhet fjalë për takimin e kryeministrit Albin Kurti me presidentin e Serbisë Aleksandar Vuçiç.
Takimi që do mbahet javën që vjen, nuk duhet të konsiderohet si takim në kuadër të dialogut por vetëm takim krize, kanë precizuar zyrtarët në Bruksel.
“Do t’i thërras dy palët, Kosovën dhe Serbinë, për një takim për menaxhimin e krizave këtu në Bruksel javën e ardhshme”, ka deklaruar Borrell në margjinat e takimit të ministrave të mbrojtjes të NATO-s.
Ai e ka cilësuar të rëndësishëm bashkëpunimin ndërmjet NATO-s dhe Bashkimit Evropian, që u dëshmua në Kosovë më rastin e rritjes së tensioneve.
“Ju e dini se ka ndodhur një incident për arrestimin e tre policëve nga Kosova dhe ne po mundohemi të përcaktojmë saktësisht se çfarë ka ndodhur. Jemi në kontakt të ngushtë me komandën e KFOR-it dhe me të dyja palët në rregull për të parë se çfarë ka ndodhur në të vërtetë atje që çoi në këtë arrestim. Ndërkohë duhet të bëjmë thirrje për qetësi në terren dhe duke parë situatën duke u përkeqësuar çdo ditë jemi sërish në modalitetin e menaxhimit të krizave”, u shpreh Borrell./RTK
Discussion about this post