Gjyqtari i njohur shqiptar, Ledio Bianku, është zgjedhur si anëtar i Gjykatës Kushtetuese në Bosnje-Hercegovinë. Menjëherë pas këtij lajmi ish ministri i Drejtësisë Ylli Manjani tha se Shqipëria nuk kishte një vend për profesionalizmin e tij, ndonëse Gjykata Kushtetuese ende nuk i ka plotësuar vakancat.
“Ledi Bianku shërbeu gjyqtar në Gjykatën Europiane të të Drejtave të Njeriut, i përzgjedhur nga shteti shqiptar. Sot ai është përzgjedhur të shërbejë në Gjykatën Kushtetuese të Bosnje Herzegovinës. Shteti ynë nuk kishte një vend në Gjykatën Kushtetuese të boshatisur, për gjyqtarin e tij!”, thotë Manjani.
Duke iu referuar këtij rasti, Manjani thotë se shtetit shqiptar duhet t’i vijë turp për këtë vendim.
“Ky quhet shtet karagjoz! Turp sa më s’ka! Le që kush e humbi turpin ta gjejnë shtetarucët tanë!? Nuk na ka hije, jo”, thotë ai.
Vitet e fundit profesionistë të të gjitha fushave janë larguar nga vendi dhe kanë gjetur mundësi më të mira punësimi në vende të tjera në botë.
