Trajneri i Egjiptit, Hossam Hassan, ka qenë i papërmbajtshëm në konferencë për mediet, ku ashtu si lojtarët e tij, akuzoi për trukim të ndeshjes ndaj Argjentinës (ekipi i tij u përmbys 3-2). Ai akuzoi hapur FIFA-n se kishte trukuar ndeshjen, duke bërë të qartë që mendonte se ajo kërkonte me çdo kusht të shpallte përsëri Argjentinën kampione.
“Do të them çfarë kam në mendje pavarësisht nga pasoja. Kjo ishte qartë një ndeshje e manipuluar dhe e gjithë bota e pa këtë. Dhe dua të them edhe një gjë tjetër, nëse ata duan kaq shumë që Argjentina të fitojë, pse t’i thërrasin të gjithë të vijnë dhe të marrin pjesë? Gjithçka ka të bëjë me paratë. Ata duan që Messi të qëndrojë në turne. Në futboll, shumë gjëra ndodhin jashtë fushës. Ajo që ndodhi ishte e padrejtë”, tha mes të tjerash Hossam Hassan.
Pas golit të barazimit të Messit, lojtarët dhe stafi i Egjiptit protestuan ashpër ndaj vendimeve të arbitrit, duke pretenduar se në aksion kishte pasur faull. Pakënaqësitë u shtuan edhe për faktin se më herët një gol i Egjiptit ishte anuluar për faull në ndërtimin e aksionit.
Tensionet kulmuan në minutat e fundit, kur arbitri Letexier ndëshkoi me karton të verdhë një anëtar të stafit egjiptian. Menjëherë pas kësaj, Hossam Hassan bëri një shenjë në formë “X” me duar në drejtim të gjyqtarit, një gjest që në futboll është përdorur në raste të ndryshme dhe që shpesh lidhet me sinjalizimin e pretendimeve për abuzim racist, edhe pse nuk është konfirmuar se ky ishte mesazhi që synonte të përcillte trajneri egjiptian.
Një situatë e ngjashme u regjistrua edhe në vitin 2010, kur Jose Mourinho, atëherë trajner i Interit, përdori një gjest të ngjashëm ndaj zyrtarëve të ndeshjes. Veprimi u interpretua si simbol i prangave dhe portugezi u pezullua me tre ndeshje.
gijotina.com/
Discussion about this post