Pas një muaji spektakli, emocionesh dhe surprizash, sot vjen momenti më i shumëpritur i Kupës së Botës 2026. Në stadiumin MetLife në New Jersey, dy superfuqi të futbollit, Spanja dhe Argjentina, do të zbresin në fushë për të luftuar për trofeun më të rëndësishëm në futbollin botëror.
Për herë të parë në histori, në finalen e Botërorit përballen kampionia në fuqi e Evropës dhe kampionia në fuqi e Amerikës së Jugut, në një duel që pritet të mbajë të mbërthyer miliona tifozë në mbarë globin.
Spanja ka qenë skuadra më dominuese e këtij Botërori. Iberikët kanë pësuar vetëm një gol gjatë gjithë turneut dhe nuk kanë qenë asnjëherë në disavantazh, duke vendosur edhe një rekord historik me gjashtë ndeshje pa pësuar gol. Pas barazimit zhgënjyes në ndeshjen hapëse ndaj Kepit të Gjelbër, skuadra e Luis de la Fuente reagoi në mënyrë perfekte, duke fituar gjashtë takime radhazi dhe eliminuar Austrinë, Portugalinë, Belgjikën dhe Francën në rrugën drejt finales.
Nga ana tjetër, Argjentina ka treguar edhe një herë ADN-në e saj fituese. Kampionët në fuqi siguruan finalen e shtatë në historinë e tyre pasi përmbysën Anglinë me rezultatin 2-1 në gjysmëfinale, falë një rikthimi spektakolar në minutat e fundit. Skuadra e Lionel Scalonit ka fituar tashmë 14 ndeshje radhazi dhe synon të bëhet vetëm kombëtarja e tretë në histori që fiton dy Kupa Bote njëra pas tjetrës.
Finalja sjell edhe një përballje simbolike mes dy brezave. Nga njëra anë është legjenda Lionel Messi, që pritet të luajë ndeshjen e fundit në një Kupë Bote, ndërsa nga ana tjetër qëndron talenti spanjoll Lamine Yamal, një nga yjet që ka shkëlqyer më shumë në këtë edicion.
Edhe historia e përballjeve mes dy kombëtareve premton spektakël. Bilanci është plotësisht i barabartë, me nga gjashtë fitore për secilën skuadër dhe dy barazime. Takimi i vetëm në një Kupë Bote është fituar nga Argjentina në vitin 1966, ndërsa Spanja ka dominuar përballjet më të fundit mes tyre.
Gjithçka është gati për një finale që premton futboll të nivelit më të lartë. Spanja kërkon të kurorëzojë turneun perfekt me trofeun e dytë botëror, ndërsa Argjentina synon të mbrojë titullin dhe të shkruajë një tjetër faqe të artë në historinë e futbollit. Sonte, sytë e gjithë botës do të jenë të drejtuar nga New Jersey, aty ku do të shpallet kampioni i ri i botës.
Lamine Yamal e kishte të qartë që para nisjes së Botërorit: kur u pyet nëse Spanja do ta fitonte Kupën e Botës, talenti i Barcelonës buzëqeshi dhe u përgjigj thjesht: “Po”.
Një përgjigje që nuk habiti askënd nga ata që kanë ndjekur shpërthimin e 19-vjeçarit, i cili brenda pak vitesh është kthyer në një nga futbollistët më të veçantë në planet. Por për shumë tifozë, që parashikimi i tij të realizohet, Yamal duhej të ishte protagonisti absolut i këtij Botërori.
Deri tani, historia ka qenë pak më ndryshe.
Spanjolli ka shënuar vetëm një gol dhe nuk ka dhënë asnjë asist në turne, ndërsa emra si Lionel Messi, Kylian Mbappé, Harry Kane, Jude Bellingham apo Erling Haaland kanë marrë më shumë vëmendje me paraqitjet e tyre.
Megjithatë, Spanja ka arritur finalen pa pasur nevojë për një Yamal vendimtar. Tani, në sfidën e madhe ndaj Argjentinës në New Jersey, pyetja është: a do të jetë kjo ndeshja që do ta kthejë Botërorin e tij nga një turne i qetë në një moment historik?
Statistikat tregojnë se Yamal tashmë është pjesë e një grupi të jashtëzakonshëm. Ai nuk ka humbur asnjë ndeshje zyrtare me Spanjën në 27 paraqitjet e tij të para dhe ka fituar të gjitha 12 ndeshjet që ka nisur në turnetë madhorë.
Nëse shënon në finalen ndaj Argjentinës, ai do të bëhej vetëm adoleshenti i tretë në histori që gjen rrjetën në një finale Botërori, pas Pelés në vitin 1958 dhe Kylian Mbappé në vitin 2018.
Nëse Spanja shpallet kampione, Yamal do të ishte vetëm lojtari i katërt adoleshent që nis një finale Botërori dhe ngre trofeun, pas Pelés, Mbappés dhe italianit Giuseppe Bergomi.
Për tifozët spanjollë, megjithatë, golat nuk janë gjëja më e rëndësishme.
“Nëse fiton Botërorin me Spanjën, askush nuk do të kujtojë nëse shënoi shumë apo krijoi shumë gola. Ai do të jetë legjendë përgjithmonë”, tha një tifoz i La Rojas.
Botërori i Yamal nuk ka qenë aspak i dobët. Ai thjesht nuk ka pasur shkëlqimin që shumë prisnin.
I rikuperuar nga një dëmtim para turneut, ai nisi në stol ndeshjen hapëse ndaj Kepit të Gjelbër dhe më pas shënoi në debutimin e tij si titullar në Kupën e Botës.
Në total, ai ka treguar vazhdimisht rrezik me topin në këmbë. Yamal ka tentuar 49 driblime, më shumë se çdo lojtar tjetër në turne, ndërsa ka kompletuar 22 prej tyre.
Para gjysmëfinales me Francën, Rodri kishte kërkuar që shoku i tij i skuadrës të luante më i qetë.
“Duhet të ulë pak ankthin për të provuar veten. Është një lojtar shumë i rëndësishëm për ne, por është vetëm 19 vjeç dhe duhet ta ndihmojmë në momente të caktuara”, tha mesfushori spanjoll.
Finalja ndaj Argjentinës ka edhe një histori simbolike. Në njërën anë është Lionel Messi, 39 vjeç, në kërkim të Kupës së dytë të Botës. Në anën tjetër është Yamal, lojtari që shumë e shohin si një nga pasardhësit e mundshëm të tij.
Historia e tyre është bërë tashmë e famshme: gati 20 vite më parë, një Messi 20-vjeçar u fotografua duke larë një Lamine Yamal vetëm 5 muajsh në një set fotografik.
Krahasimet me Messin janë të pashmangshme, por trajneri i Spanjës, Luis de la Fuente, kërkon t’i japë fund tyre.
“Gabimi më i madh do të ishte ta krahasonim me Messin apo Maradonën. Ai është ende në një proces zhvillimi”, tha trajneri spanjoll.
Në moshën 19-vjeçare, Yamal ka fituar tashmë një Europian, ka luajtur në një gjysmëfinale të Champions League dhe mban fanellën me numrin 10 te Barcelona.
Për shumë njerëz, kjo finale është beteja mes së shkuarës dhe së ardhmes: Messi kundër Yamal.
Nëse Argjentina fiton, historia do të jetë ajo e triumfit të fundit të gjeniut nga Rosario. Por nëse Spanja ngre trofeun, kjo mund të kujtohet si nata kur një tjetër yll mori skenën botërore.
Siç shkruan BBC, për Lamine Yamal kjo finale mund të jetë momenti që përcakton nëse Botërori 2026 do të mbahet mend si fillimi i një legjende… apo si një mundësi e humbur.
Infantino u shpreh se madhështia e këtij edicioni ka tejkaluar edhe pritshmëritë e tij, duke përdorur fjalë superlative për atmosferën, organizimin dhe ndikimin global të Kupës së Botës.
“Kjo finale është një dhuratë nga perënditë e futbollit. E imagjinoja se do të ishte një event madhështor, por jo në këtë përmasë. Jo me këtë atmosferë, këtë festë dhe këtë energji”, deklaroi kreu i FIFA-s.
gijotina.com/
Discussion about this post