Jo, as këtë herë trofeu nuk u kthye në shtëpi… Anglia, e nisur si një nga skuadrat favorite për Katar 2022, fatkeqësisht doli në çerekfinale nga Franca. Kështu kombëtarja e Tre Luanëve duhet të presë medoemos edhe 4 vite të tjera për të rifilluar garën drejt ëndrrës Kupa e Botës.
Por duhet theksuar se skuadra e Southgate ka shkëlqyer për diçka. Në fakt ishte Anglia ajo që mori më pak kartona në të gjithë turneun, duke fituar kështu të ashtuquajturin çmim “Fair Play”. Një ngushëllim i dobët, në të vërtetë shumë i dobët, që nuk u prit shumë mirë në shtëpi…
Në pesë ndeshjet e luajtura, anglezët kanë marrë vetëm një karton të verdhë. Edhe atë arbitri brazilian Sampaio ia tregoi Harry Maguire në minutën e 90 të humbjes fatale në çerekfinalen ndaj Francës. Vetëm një sanksion në mbi 500 minuta lojë, vërtetë shumë pak. Si për të thënë se skuadra e drejtuar nga Southgate ka vënë në fushë pak agresivitet konkurrues, siç pretendojnë shumë në Angli. E në fakt lajmi për “fitoren” e çmimit “Fair Play” ka marrë shumë kritika.
SARKAZMA E ISH-FUTBOLLISTËVE
Komentatorët e Botëror të Katarit për ITV kanë vënë në pah këtë të dhënë, duke e parë si diçka negative. Duke filluar nga Roy Keane, i cili foli për mungesën e agresivitetit nga ana e britanikëve.
I të njëjtit mendim edhe Gary Neville: “Nuk është se duhet të komplimentojmë një skuadër kur ata marrin shumë kartonë. Por të marrim vetëm një në të gjithë turneun do të thotë se ndoshta kemi qenë shumë të sjellshëm,” tha ish-mbrojtësi i Manchester United.
Ndoshta, ndonjë ndërhyrje më shumë nuk do ta kishin bërë Anglinë të fitonte Kupën e Botës. Por ndoshta do t’u kishte treguar tifozëve dhe specialistëve apo komentatorëve në TV, se lojtarët e Anglisë dëshironin shumë t’a sillnin në shtëpi.
Discussion about this post