Italia ka luajtur dhe takimin e dytë të saj, të vlefshëm për fazën në grupe të Kupës së Botës U-20, që zhvillohet në Argjentinë.
Të kaltrit, u befasuan nga afrikanët e Nigerisë duke u mposhtur me rezultatin 2-0.
“Shqiponjat”, treguan se janë një kockë e fortë, në kompeticionet e moshave, duke dëshmuar se kanë talente të një cilësie të shumë të lartë.
Italia tentoi gjatë gjithë takimit, që të merrte epërsinë, megjithatë mbrojtja e Nigerisë, i rezistoi sulmeve të europianëve.
Pas një pjese të parë pa gola, në pjesën e dytë, afrikano-perëndimorët kaluan në avantazh në minutën e 61’, falë Salem Fango.
Italia, u hodh e gjitha në sulm, për të barazuar rezultatin, por nuk mundi të gjente kthjelltësinë e duhur, përballë portierit të Nigerisë.
Sulmet e dëshpëruara nuk sollën rezultat, me Italinë që pësoi dhe golin e dytë në minutën e 95’.
Sunday Jude, realizoi për të mbyllur përfundimisht takimin e për t’i siguruar tre pikë të arta kombëtares së vendit të tij.
Me këtë fitore, Nigeria siguron biletën për në fazën e dytë të Botërorit, me takimin ndaj Brazilit që do shërbejë thjesht për statistikë.
Nga ana tjetër, Italia duhet të mposhtë Republikën Domenikane, në mënyrë që të mos rrezikojë eliminimin që në fazën e grupeve./m.b /gijotina.com
Discussion about this post