I deleguari politik i PD-së në Qarkun Berat, Eno Bozdo denoncoi përmes një deklarate për mediat kryetarin e degës së PS në Poliçan, njëherazi drejtuesin politik të socialistëve në zgjedhjet e 11 majit, Erjon Zylyftari.
Bozdo tha se kryesocialisti është përgjegjës për zhdukjen e 54 ton lëndë e parë nga Uzina Mekanike Poliçan, kur mbante detyrën e drejtorit të kësaj uzine, duke i shkaktuar buxhetit të shtetit një dëm prej 250 mln lekësh.
“Sot ai drejton fushatën e PS-së në Poliçan”, tha Bozdo duke shtuar se “Erjon Zylyftari duhet të japë llogari për këtë vjedhje por dhe për dënimin që ka marrë në shtetin grek””.
Demokrati tha gjatë konferencës për shtyp se Erjon Zylyftari është arrestuar në Greqi dhe drejtësia e fqinjit jugor e ka dënuar atë me 8 vite burg.
Deklarata
Erjon Zylyftari, Kreu i Partisë Socialistë të Poliçanit dhe njeriu që drejton fushatën e Partisë Socialiste në këtë bashki, sipas një raporti zyrtar të Kontrollit të Lartë të Shtetit, rezulton se është direkt përgjegjës për zhdukjen e sasive shumë të mëdha të lëndëve të para të vlefshme nga invetari i Uzinës Mekanike Poliçan, kur vetë Zylyfari ishte drejtor i saj! Kështu, në vitin 2021, Kontrolli i Lartë i Shtetit zbuloi se ishin “zhdukur” 54 ton lëndë e parë tunxh, bronz dhe bakër, të maskuar si “skrap”. Sipas përllogaritjeve të KLSH-së, vlera totale e dëmit financiar të shkaktuar (dmth vjedhjes) është 250 milionë lekë.
Për këtë skandal, përgjegjës kryesor është ish-drejtori i Uzinës Mekanike, Erjon Zylyftari, sot drejtues i PS-së në Poliçan. Në vitin 2022, Prokuroria e Beratit nisi zyrtarisht hetimet, gjë që solli edhe marrjen në pyetje të Bledi Çuçit, ministrit socialist në atë kohë.
Pas 3 vitesh hetime, Prokuroria ka ngecur dhe nuk ka asnjë avancim në këtë dosje. Vjedhja e materialeve është tashmë e faktuar dhe pikërsht në kohën kur Erjon Zylyftari ishte drejtor i kësaj Uzine. Raporti i KLSH fakton përgjegjësinë direkte të Zylyftarin në këtë aferë. Prokuroria ka tre vjet që e mban ketë dosje dhe nuk bën asnjë hap përpara. Pse ndodh kjo? Apo sepse Zylyftari është drejtues politik i Partisë në Poliçan? Pse atij i ofrohet kjo mbrojtje shumë e fortë? Kush ka nderhyrë që kjo dosje të “ngecë” dhe mos të këtë asnjë zhvillim?
Disa pyetje për Zylyftarin: Kur keni jetuar në Greqi, a keni shkelur ligjin aty? A jeni dënuar ju me 8 vjet burg, me emër tjetër? A është dosja juaj në Policinë e Beratit, ku mbahet sepse njerëzit e partisë suaj janë mbi ligjin dhe ligji nuk i prek ata?
Këto pyetje meritojnë përgjigje. Dhe përgjigjen e merituar do ta marrin në 11 maj! Ndryshimi po vjen! Ne do pastrojmë shtëpinë tonë nga të korruptuarit, kriminelët dhe hajdutët e parave të shqiptarëve.
Discussion about this post