Ish zëvendëskryeministri Erion Braçe, i cili është njëkohësisht deputet i Partisë Socialiste ka sulmuar ashpër kryeministrin dhe kryetarin e partisë së tij për rritjen e çmimeve në mënyrë fiktive. Braçe ka thumbuar kryeministrin Rama, duke i vënë në dukje se çmimet tek ne nuk i nënshtrohen konkurrencës, por caktohen dhe njoftohen!
“Copëtojnë të varfëritë, të pasurit të paguajnë atë që i takon. Çmimet nuk godasin të pasurit! Çmimet copëtojnë të varfëritë! Çmimet shtyjnë për poshtë, në varfëri, shtresën e mesme! Çmimet thellojnë pabarazinë, polarizojnë shoqërinë! Këtë duhet të ndalim! Çmimet do jetë e pamundur t’i ndalim, por ai që duhet të ndalim është abuzimi!”, shprehet Braçe.
Deklarata e Braçes vjen pas një sërë çmimesh të rritura në mënyrë fiktive gjatë ditëve të fundit, që nga çmimi i bukës, çmimi i kafes e deri te çmimi i gazit. Për çmimin e bukës, madje pati dhe një hetim formal nga Autoriteti i Konkurrencës, por ministri i doli në mbrojtje konkluzioneve, duke pretenduar se çmimet janë rritur në raport me tregun. Por për Braçen: “Tregjet tona janë të përqendruara, të kontrolluara nga vetëm 4-5 kompani, thuajse me konkurrencë formale. Çmimet në to as funksionojnë si në bursë dhe as përcillen siç bursa vendos. Çmimet këtu nuk i nënshtrohen konkurrencës, çmimet këtu caktohen, njoftohen!”
Sipas deputetit socialist, rritja e çmimeve pa ndryshuar tatimet e taksat, po sjell të ardhura shtesë në arkën e shtetit, shumica paguar nga qytetarët për shkak të tvsh, akcizës etj. “Dua ta sqaroj njëherë e mirë, i paguajnë qytetarët, biznesi i madh bën thjesht agjentin e qeverisë. Ndaj duhet të rishpërndajmë. Dy rruge ka: përmes tatimeve e taksave, veçanërisht atyre që mbitatojnë konsumin, të ardhurat nga puna, uljes së tyre; përmes pagesave të drejtpërdrejta, mbrojtëse e rimbursuese për të varfrit dhe shtresën e mesme. Të paktën, këtë herë barra e krizës nuk mund të përballohet nga të varfëritë e të mesmit. Tërmetin e pandeminë e paguan plotësisht ata; Kriza e çmimeve sado e përkohshme të jete, nuk duhet të pasurojë edhe më të pasurit, por të përballohet prej tyre. Pa shtuar asnjë tatim për ta, por duke i bërë të paguajnë ndershmërisht atë që u takon, atë që e fshehin dhe qe i ka mbipasuruar!”, shprehet Braçe.
Ai shprehet më tej se janë 100 VIP-a që përfitojnë nga kjo skemë.
“Në kuvend javën e dytë të shtatorit ua thashë me emra e mbiemra, xhiro, fitim qesharak dhe tatim akoma dhe më qesharak të paguar. Javën që shkoi Shtëpia e Bardhë publikoi një raport për nivelin e tatimeve të paguara nga 400 familjet më të pasura te Amerikës, jashtëzakonisht i ulët krahasuar me nivelin e tatimeve të punëtorëve”, shpreh Braçe indinjatën e tij.
