Nënkryetari i Partisë së Lirisë, Endrit Braimllari, njëherësh edhe anëtar i Këshillit Bashkiak të Tiranës, denoncoi sot atë që e konsideron si heshtjen mafioze të Erion Veliajt, Kryebashkiakut të Tiranës, përsa i takon inceneratorit.
Braimllari tha se Erion Veliaj është një zyrtar i përfshirë drejtpërdrejtë në procedurën e dhënies me koncesion për inceneratorin e Tiranës dhe ai është përgjegjës për çdo pagesë që është bërë, pavarësisht se nuk merreshin shërbimet që parashikoheshin në kontratë.
“Erion Veliaj dhe stafi i tij i ngushtë janë tërësisht të lidhur me koncesion 30 vjecar të inceneratorit të Tiranës, nga dita e parë që ky projekt mafioz që prekte cdo qytetar të Tiranës fillojë të zbatohej.
Erion Veliaj ka qenë në dijeni të plotë se shërbimi që ofrohej nga Inceneratori i Tiranës nuk ishte ai shërbim i parashikuar në kontratë, por ai vazhdoi me kokëfortësi të paguante 29 Euro/Ton dhe me mosveprimet institucionale të Bashkisë që ai drejton, ka lejuar dëmin kolosal financiar që po rrënon taksapaguesit e Tiranës dhe të gjithë Shqipërisë”, tha Braimllari.
Ai u shpreh se në emër edhe të këshilltarëve të PL-së i ka kërkuar Kryebashkiakut që të bëjë transparencë, por ai ka zgjedhur të heshtë.
“Qartazi Veliaj është instruktuar të mos flasë, për të mos kompromentuar më tepër përgjegjësinë penale që ai ka.
Veliaj është instruktuar të mos flasë dhe të heshtë, ai është strukur brenda mureve të bashksië, sepse i gënjen mendja, që me presion ndaj drejtësisë, me paratë, influencën e brendshme dhe të huaj dhe duke përdorur Bashkinë e Tiranës si një bunker ku mund të mbrohet nga drejtësia dhe të shpëtojë nga roli i tij, me firmë dhe vulë në aferën mafioze të inceneratorit të Tiranës”, tha këshilltari i PL-së.
Discussion about this post