Banka e Shqipërisë për të disatën herë i ka kërkuar qeverisë që të ndërmarrë politika ekonomike që do ndihmojnë vendin të ringrihet. Këtë kërkesë e ka bërë Guvernatori, Gent Sejko, i cili mori pjesë në një tryezë të rrumbullakët të organizuar nga Ambasada e Mbretërisë së Bashkuar në Tiranë.
Ky takim kishte në fokus çështjet kryesore me të cilat po përballet aktualisht Shqipëria, si sfidat e paraqitura nga ndryshimet e shpejta klimaterike; vështirësitë ekonomike që rrjedhin nga historia e vendit; situata e krijuar për shkak të pandemisë COVID-19; si dhe sfidat e qeverisjes. Sipas Sejkos, qeveria të mos humbas më kohë, por duhet të marrë në dorë situatën ekonomike.
“Politikat ekonomike duhet të vazhdojnë të ushqejnë rimëkëmbjen dhe të shmangin heqjen e nxituar të stimulit. Nga ana tjetër, vëmendje e duhur duhet t’i kushtohet monitorimit të rreziqeve të mundshme që dalin nga mbingarkesa e borxhit, si në sektorin publik, ashtu edhe në atë privat, dhe rritjen e inflacionit”, u shpreh ai.
Ndër të tjera, Sejko vuri në dukje se edhe strategjitë e huadhënies së bankave duhet të balancohen midis optimizmit të rrezikut/kthimit dhe shërbimit të interesave të komunitetit, duke ndarë më shumë fonde për bizneset që krijojnë më shumë vende pune. Sipas guvernatorit, është shumë e rëndësishme që ndërtimi i një të ardhmeje më të mirë të fillojë me gjetjen e një rruge të sigurt për të dalë nga pandemia.
E.H/ gijotina.com/
