Banka e Shqipërisë ka dalën në përfundimin se sezoni veror i këtij viti ka qenë më fitimprurës se ai i vitit 2019. Në raportin e publikuar së fundmi BSH tregon se, për periudhën korrik-shtator turistët që kanë ardhur në Shqipëri kanë harxhuar 786 milionë euro, nga 782 milionë euro që u shpenzuan në vitin më të mirë atë të 2019-ës. Konkretisht, vetëm të huajit kanë shpenzuar për udhëtime në vendin tonë 1.4 miliardë euro, duke u rritur ndjeshëm në raport me 2020, kur gjithë vitin u shpenzuan vetëm 986 milionë euro. Ndërsa qytetarët shqiptar kanë harxhuar 801 milionë euro, ndërsa në 2019 për të njëjtën periudhë kishin shpenzuar mbi 1.2 miliardë euro.
“Shërbimet e udhëtimit u mbyllën me suficit prej 385 milionë euro, kundrejt atij prej 133 milionë euro një vit më parë. Të ardhurat dhe shpenzimet nga shërbimet e udhëtimeve u dyfishuan në terma vjetorë. Kjo ecuri është pasojë direkte e rritjes së fluksit të udhëtarëve, gjatë sezonit turistik”, thuhet në raportin e Bankës së Shqipërisë. Ndërsa sipas të dhënave të INSTAT në total deri fund të tetorit në Shqipëri kanë hyrë 5.1 milionë shtetas të huaj, duke u rritur me 2.2 herë në raport me 2020. Ndërkohë në 2019 në dhjetë muaj në Shqipëri kishin hyrë 5.8 milionë turistë. Banka e Shqipërisë, vlerëson se ky përmirësim ka ndodhur për shkak të lehtësimit të masave anti-covid, ndërsa rekomandon që mos të ketë shtrëngime për sezonin dimëror.
Discussion about this post