Gjyqtarja Iliba Bezati është caktuar në postin e nënkryetares së Gjykatës së Apelit e të Juridiksionit të Përgjithshëm për një mandat 3-vjeçar.
Vendimi është marrë në mbledhjen e sotme të trupës së gjyqtarëve të Apelit, teksa në “garë” për atë pozicion ishte dhe gjyqtari Fatri Islamaj. Apeli raporton se Iliba Bezati është zgjedhur me 18 vota pro të anëtarëve të Gjykatës së Apelit.
Iliba Bezati është kunata e Pamela Qirkos, kryetarja e shkallës së parë të vetingut (KPK-së), teksa kjo e fundit është motra e zv.kryeministres Belinda Balluku.
Ky “shpërblim” për Iliba Bezatin vjen pas vendimit të marrë më 26 shtator, pasi ishte një prej tre anëtarëve në trupën gjykuese të Apelit që dënoi me 1 vit burgim Ervin Salianjin për shkak se i prishi imazhin Qeverisë duke denoncuar Geron Xhafajn, vëllain trafikant droge të ish-ministrit Fatmir Xhafaj.
Gjyqtarja Iliba Bezati u konfirmua në detyrë në të dy shkallët e vetingut, edhe pse u konstatua se kishte “fshehje pasurie”, “deklarim të rremë” dhe një rast “konflikt interesi” të bashkëshortit të saj.
Vetingu rrëzoi edhe një raport të Drejtorisë së Sigurimit të Informacionit të Klasifikuar (DSIK), i cili kishte konstatuar papërshtatshmërinë e gjyqtares Iliba Bezati. Madje, Komisioni vlerësoi se Iliba Bezati nuk mbante përgjegjësi mbi ligjshmërinë e burimit të të ardhurave të vjehrrës që kishin shërbyer si burim kryesor i pasurisë së saj.
Në deklaratat e pasurisë, të dorëzuar pranë ILDKPKI prej vitit 2003, gjyqtarja Iliba Bezat deklaron se ka në pronësi të paktën pesë apartamente. Këto të dhëna i referohen deklarimeve deri në vitin 2017.
Ndërkohë, një tjetër pikë e diskutueshme në pasurinë e gjyqtares Bezati ishte edhe shit-blerja e automjeteve. Në vitin 2003, ajo deklaron se ka në pronësi një automjet, të blerë me vlerën 200 mijë lekë të reja. Në vitin 2005, gjithnjë sipas vetëdeklarimeve të gjyqtares, familja Bezati shpenzon në blerjen e dy automjeteve të tjera, njëri, tip “Golf” me vlerë 100 mijë lekë dhe tjetrin me vlerë 200 mijë lekë. Në vitin 2007, gjyqtarja deklaron se ka shitur automjetin tip “Golf” për shumën 500 mijë lekë. Pra, rezulton se automjeti është shitur 4 herë më shumë se sa është bler
Komisioneri Publik kishte kërkuar shkarkimin e saj, për probleme të theksuara me pasurinë. Por, me ndërhyrje të fuqishme politike, gjyqtarja Bezat u konfirmua në detyrë dhe u shndërrua në “kamikazë” të Fatmir Xhafajt në gjyqin kundër Salianjit. Për më tepër që, ajo i ka pasur një detyrim të hershëm Xhafajt. Në vitin 2004, kur Fatmir Xhafaj ishte Ministër i Drejtësisë, gjyqtarja Bezat u promovua nga gjykata e shkallës së parë në Vlorë, në atë të Apelit po në atë qytet.
Discussion about this post