Të burgosurit e Burgut të Sigurisë së Lartë në qytetin e Burrelit kanë formalizuar kërkesat e tyre pas bisedimeve me drejtues të Institucionit të Ekzekutimit të Vendimeve Penale.
Burime pranë burgut thonë se pas negociatave të burgosurit i kanë dërguar kërkesat e tyre në rrugë zyrtare, ndërmjet disa institucioneve përgjegjëse.
Po ashtu mësohet se aktualisht vetëm 20 nga 70 të burgosurit që refuzuan ushqimin vijojnë ta bëjnë. Por edhe këta 20 të burgosur pritet t’i rikthehen normalitetit ditën e sotme.
Të burgosurit e burgut të sigurisë së lartë në Burrel refuzuan të hënën ushqimin e institucionit, pasi kërkonin rritjen e numrit të takimeve mujore dhe zgjerimin e rrethit familjar në takime.
Këto kërkesa tashmë ata i kanë dërguar në rrugë zyrtare pranë Drejtorisë së Përgjithshme të Burgjeve.
Nuk është hera e parë që të burgosurit zhvillojnë grevë urie, për shkak se duan të zhvillojnë takime me familjarët tyre.
