Ferdi Metushi, 59-vjeçar ka ndërruar jetë më 19 prillit në fshatin Mollaj të Ballshit, ku mjeti i tij është rrëzuar në pikën e grumbullimit të inerteve duke e zënë poshtë. Ndërkohë ditën e sotme bashkëshortja e Ferdit, Mbarime Metushi, i bën thirrje drejtësisë dhe ministrit Manja që të zbardhet sa më parë e vërteta.
Bashkëshortja e të ndjerit ka hedhur akuza të forta ndaj drejtuesve të firmës dhe grupit hetimor se provat janë manipuluar. Sipas saj Ferdi nuk ka qenë i siguruar dhe është futur në skemë pas vdekjes. Ndërkohë ajo denoncon edhe një tjetër fakt, atë të shfrytëzimit të lumit Vjosë. Mbarime thekson se ka bërë denoncim lidhur me dyshimet e saj dhe familjes por ende nuk ka asnjë reagim.
“Kërkoj të drejtën e burrit tim se pse u vra, kanë dhënë deklarata të ndryshme nga realiteti, na kanë rënduar jashtë mase, burri punonte ditën dhe natën, ka qenë i pasiguruar, dëgjoj pronarin që më erdhi në shtëpi dhe tha se ishte i siguruar. Pas verifikimeve ka dalë që burri im është siguruar pas vdekjes, shkak i defektit ka qenë leva e marshit, nuk na kanë lajmëruar fare ne si familje, pse? Më vonë pasi janë verifikuar me fakte, për shkakun e aksidentit, kemi parë se ka pasur ndërhyrje te kjo makinë, te leva e marshit. Burri im nuk ishte një punëtor i thjeshtë, ka qenë mekanik, shofer, e njohin në të gjithë jugun, ka punuar në autostrada. Nuk më kanë ardhur nga kompania, heshtje, heshtje, dhe vetëm heshtje, Fiama SHPK, e ka emrin firma. Pronari e ka emrin Arben Lutaj, lekët ja vononte, lekët i merrte gjithnjë në dorë. Kërkoj zbardhjen e të vërtetës, kërkoj gjakun e burrit tim, vetëm heshtje, vetëm dhimbje. Na kanë marrë në pyetje vetëm ditën e kallëzimit, dua të theksoj dhe diçka tjetër, se thuhet se nuk punohet natën, policia ka shkuar dhe ka kapur shokë të tjerë, edhe e nxorën, sepse nuk lejohet që të marrësh inerte në Vjosë. Aty vazhdojnë që të nxirren inerte”, shprehet Mbarime Metushi.
Discussion about this post