Kreu i Policisë së Tiranës Tonin Vocaj e cilësoi ngjarje “jo sensitive” për ta njoftuar, plagosjen nga bashkëshorti i ministres Delina Ibrahimaj, të një vartësi të kësaj të fundit.
I pyetur për se pse rasti nuk u njoftua publikisht gjatë një dalje për mediat ku njoftoi lidhur me rezultatet e një aksioni anti-drogë, Vocaj u përgjigj:
“Ngjarja është e vitit të kaluar. Lidhur me këtë ngjarje strukturat e hetimit të komisariatit nr.1. kanë kryer procedurat. Materialet janë çuar në prokurori, për veprën penale goditje për shkak të detyrës. Është e vërtetë fakti se nuk është bërë e mundur që të kapet menjëherë autori i kësaj ngjarje. Lidhur me pyetjen tuaj se policia ka pasur një mungesë transparence, kjo ngjarje nuk futet te ngjarjet sensitive për të cilat policia jep njoftime për shtyp. Të gjitha materialet janë referuar në prokurori, dhe është prokuroria që po heton këtë çështje”.
Ngjarja u raportua në media disa ditë më parë, ndërsa u ngritën dyshime se strukturat e shtetit kanë vepruar në mënyrë të njëanshme duke favorizuar bashkëshortin e ministres. Opozita nga ana tjetër kërkoi dorëheqjen e Delina Ibrahimajt nga posti i ministres së Financave, ndërsa kjo e fundit u shpreh se “bashkëshorti im ka qenë padrejtësisht i kallëzuar për diçka që nuk e ka bërë”.
Lexo edhe:
Dritëhije mbi kërkesën e Prokurorisë për pushimin e çështjes për bashkëshortin e ministres Ibrahimaj
Discussion about this post