Analisti Andi Bushati, ka folur për pezullimin nga detyra të Belinda Ballukut dhe ndalimin e saj për të dalë jashtë vendit, të dyja vendimet të GJKKO, pas kërkesës së SPAK.
Bushati tha se në pamje të parë, duket sikur SPAK po vepron pa lejen e Edi Ramës, pasi ky i fundit ka dhënë shenjat se jo vetëm nuk e ka “lëshuar” Ballukun, por po “konfrontohet” për herë të parë me SPAK.
Bushati foli edhe për hipotezën e hedhur se mbrapa këtij “trimërimi” të SPAK mund të jetë një faktor i huaj, si amerikanët.
Bushati: Duket sikur për herë të parë, SPAK ka dalë përtej lejes që i jep Edi Rama. Nuk ka shkuar deri te Rama, por sikur ka leje të veprojë edhe pa lejen e Ramës. Duket qartë që Rama nuk do ta dorëzojë Belinda Ballukun. Është pak më pozitive, se përpara, por jemi larg një drejtësie të pavarur.
Konkluzioni i dytë, jemi për herë të parë, që duket sikur Rama, konfrontohet ballë për ballë me drejtësinë. Nëse e mbajmë mend, pa u bërë reforma, që nga rasti i Shpëtim Gjikës, deviza e Ramës ka qenë “nuk do të bëhemi pengesë për drejtësinë” dhe strehë për njerëzit e familjes tonë me të cilën ka punë drejtësia. Sot ndejti shtatë orë me Ballukun pas vendimit të gjykatës, kur prisnim minimumin e pezullimit apo shkarkimit. Mediat e Ramës, thonë se pezullimi i Ballukut është anti-kushtetuese. Duket se ka konfrontim midis SPAK, GJKKO dhe Ramës.
E treta, ore çfarë i trimërojë këta njerëz? Me sa i njohim, këta nuk veprojnë pa patur ndonjë ombrellë. A kemi një lëvizje tektonike të ekuilibrave? Mos është futur ndonjë kaubojs amerikan? Kjo shpjegon edhe trimërimin e SPAK, GJKKO-së dhe faktin që Rama po e sheh që një faktor tjetër mund të luajë lojën që do luajë ai. Këtu pastaj, duket sikur hyn në një fazë të re të lojës. Këto janë për mua tre pikat.
Po t`i shtojmë, edhe faktin që është kapur Veliaj, por për brekët e Ajolës. Beqja për faturat e resotrantit. Ben Ahmetaj për vilat dhe jo vendimet. Te rasti Balluku, jemi për herë të parë, që po hetohen dy vepra madhore ku është Rama i përfshirë, Tuneli dhe Unaza. Nuk kemi më fabulën e njerëzve që hanë kumblla dhe dardha pas kurrizit të Ramës, por po tregohet se korrupsionin e bën Rama. Kjo mund të jetë edhe arsyeja e kundërvënies që po lind, që është në filizë mes Ramës dhe SPAK.
Discussion about this post