Në mbledhjen e sotme të Konferencës së Kryetarëve është diskutuar për buxhetin e vitit 2022. Ministrja e Ekonomisë dhe Financës, Delina Ibrahimaj theksoi se rritja në të gjithë sektorët do përkthehet në punësim, duke shtuar se për vitin 2022 parashikohet rritje ekonomike deri në 4%.
“Buxheti ka për synim rimëkëmbjen e ekonomisë. Rritje në të gjithë sektorët do përkthehet në punësim dhe do të ketë nxitje për krijimin e vendeve të reja të punës. Për 2022 parashikojmë rritje ekonomike deri në 4%”, tha ministrja.
Sikurse parashikohej në buxhet, shpenzimet e personelit për vitin 2022, reflektojnë kostot e administratës publike aktuale, plus rritjen e pagave në arsim, shëndetësi dhe mbrojtje. Ministrja theksoi se pagat për këto kategori në këta tre sektorë janë parashikuar të rriten me 6% duke filluar nga viti i ardhshëm.
“Shpenzimet e personelit për vitin 2022, reflektojnë koston aktuale të Administratës Publike, si dhe politikën e re të rritjes së pagave kryesisht për sektorët e shëndetësisë, arsimit dhe mbrojtjes. Fondi vjetor për rritjen e pagave është planifikuar në shumën 2.4 miliardë lekë dhe parashikon rritjen e pagës për funksion me 6% për punonjësit shëndetësor dhe arsimorë. Shpenzimet totale për pagat në administratën publike janë planifikuar në masën 90.6 miliardë lekë ose 4.9% e PBB-së”, tha Ibrahimaj.
Në fjalën e saj, ministrja u ndal në specifika duke folur për disa nga projektet që do të mbështeten nga buxheti.
“Në mbrojtje 1 miliardë lekë për emergjencat civile. Ndërtimi i Akademisë së Mbrojtjes, rritja e pagave për ushtarakët. Kulturë, do të financohet me prioritet projekti i Teatrit të Tiranës, shpronësim i Amfiteatrit të Durrësit, rritja e pagave të TOB, qendra kombëtare për fëmijët dhe projekti i javës së kulturës europiane. Do financohet dhe agjencia e bregdetit”, tha Ibrahimaj.
Qeveria dërgoi sot në Kuvend projektligjin për “Buxhetin e Shtetit” të vitit të ardhshëm duke parashikuar të shpenzojë rreth 637 miliardë lekë kundrejt 536miliardë lekë të ardhura.
