Ministri i Brendshëm Bledi Çuçi në fjalën e tij gjatë prezantimit për buxhetin e vitit 2022 për Policinë e Shtetit, është shprehur se fokusi është te rritja e pagave dhe investimet për të përmirësuar teknikat dhe mënyrat për të luftuar krimin.
“Lufta kundër krimit të organizuar dhe lufta ndaj territorit do të ngrihen në një tjetër dimension. Shumë të rinj dhe të reja shohin te ky institucion vlerat për të ndërtuar një Shqipëri më të fortë. Ne po rinovojmë trupën dhe kapacitete profesionale. Plaga e pandemisë dhe vështirësitë që sjell kjo krizë nuk penguan rritjen për buxhetin e shtetit për policinë. Që në vitin e parë të mandatit tonë të tretë kemi një rritje prej 4% ndaj buxhetit për ministrinë e Brendshëm, për të rritur prioritete tona në fushën e sigurisë”, tha Çuçi.
Ministri i Brendshëm premtoi se efektivët e policisë që punojnë larg vendbanimeve do të kenë një bonus deri në 150% të pagës aktuale që ato marrin për t’i motivuar dhe për ta bërë më të lehtë shpenzimet që ato kanë.
“Sfida jonë mbetet gjithmonë vetvetja dhe jemi në momentin që duhet të bëjmë një kapërcim tjetër të madh që është rritja e pagave për punonjësit që punojnë larg vendbanimeve dhe për pajisjet teknologjike të inteligjente. Ne do të shtojmë buxhetin në mënyrë absolute dhe do të rialokojmë buxhetin që ka qenë deri më sot. Punonjësit që punojnë larg vendbanimit të tyre do të përfitojnë një pagë deri në 1500 ndaj pagës aktuale. Vetëm sot që flasim janë rreth 1200 punonjës që përfitojnë nga ky bonus, ky është një numër që ndryshon në vijim të ndryshimeve që bëhen. Ne jemi të vetëdijshëm në kuadër të vështirësisë që ato kanë, ndaj do të ketë një trajtim të veçantë për to”, tha ministri.
Më herët, drejtori i Policisë, Gledis Nano tha gjithashtu se punonjësit e policisë që punojnë larg qendrës së banimit do të kenë rritje page me 50%.
Discussion about this post