Në projekt buxhetin e vitit 2022, qeveria shqiptare ka lënë vend edhe për kontigjencën për gjyqet e humbura në Arbitrazhin Ndërkombëtar, Gjykatën e të Drejtave të Njeriut dhe vendimet gjyqësore administrative të formës së prerë.
Vendimet e Gjykatës së të Drejtave të Njeriut në Strasburg (GJEDNJ) janë kryesisht çështje dhe vendime që lidhen me kthimin dhe kompensimin e pronave tek ish-pronarët. Ministria e Financave dhe Ekonomisë ka respektuar vendimet e miratuara nga GJEDNJ, kjo duke konsideruar faktin se kur pagesat nuk kryhen brenda afatit tre mujor nga data kur vendimi përkatës merr formën e prerë, shteti shqiptar ngarkohet me pagesën e një kamatë-vonese për çdo ditë vonesë. Edhe për vitin 2022, likuidimi i detyrimeve të këtij lloji parashikohet të përballohet nga Fondi Rezervë i buxhetit të shtetit, ose ndryshe kontigjenca.
Mësohet se, vendimet me detyrim financiar mbi 10.000 EUR, implikojnë nxjerrjen e VKM-ve respektive për ekzekutimin e tyre, ndërsa vendimet me detyrim financiar deri në 10.000 EUR, ekzekutohen drejtpërdrejtë nga Ministria e Financave dhe Ekonomisë.
Sa i përket vendimeve të arbitrazhit, që kanë të bëjnë me zgjidhjen e konflikteve në mosmarrëveshjet dy ose shumëpalëshe, në pjesën më të madhe, efektet financiare që rrjedhin nga zbatimi i këtyre vendimeve janë përballuar nga buxheti i vetë institucioneve buxhetore.
Ndërkohë që, në rastet kur palë e paditur cilësohet ‘shteti shqiptar’ apo ‘qeveria shqiptare’, këto 58 vendime likuidohen përmes buxhetit të MFE dhe/ose Fondit Rezervë të buxhetit të shtetit, nëse lind nevoja.
Ndërsa, vendimet gjyqësore administrative të formës së prerë, kryesisht për largime nga puna të ish-punonjësve, procese gjyqësore me karakter shpronësimi implikojnë kosto buxhetore të paparashikuara. Ministria e Financave dhe Ekonomisë përveç një monitorimi periodik, i ka bërë apel edhe aftësisë menaxhuese të vetë institucioneve buxhetore, përmes aplikimit me këste apo instrumenteve të tjerë zbutës në kohë të barrës së tyre buxhetore.
Sipas Open Data Albania, deri nё qershor 2020, shteti shqiptar njeh detyrime tё mbetura që lidhen me Arbitrazhet Ndërkombëtare në vlerën totale prej 109 485 296 euro. Detyrimi përbëhet nga Dëmshpërblime që shteti shqiptar duhet t’u japë palëve, kryesisht biznese që kanë fituar në Arbitrazh ose kosto shpenzime arbitrazhi. Këto detyrime përveçse janë të formës përfundimtare, edhe janë njohur nga shteti./ D.L/ Gijotina.com
