Projektbuxheti i vitit 2022 është diskutuar sot në Komisionin e Ligjeve, ku ka qenë i ftuar edhe kreu i SPAK, Arben Kraja. Gjatë fjalës së tij Kraja, ka paraqitur nevojat për fond që ka institucioni të cilin ai drejton. Kraja kërkoi nga ligjvënësit që të parashikohet sigurimi i një objekti për akomodimin e Byrosë Kombëtare të Hetimit, e cila pritet të fillojë punën me kapacitet të plotë në muajin maj të vitit të ardhshëm.
Sipas kreut të SPAK, 28 hetuesit aktual po akomodohen në ambientet e Prokurorisë së Posaçme, por me mbërritjen e 32 hetuesve të rinj në muajin maj, do të duhet që për ta të vihet në dispozicion një ndërtesë e re.
“Ne jemi të kënaqur në parim, por kemi dy probleme që duhet ti shpreh këtu. Problemi i parë është nevoja e një ndërtese për Byronë Kombëtare të Hetimit. Byroja Kombëtare e Hetimit është një strukturë e ngritur në varësinë tonë që ka 60 hetues, shto drejtorin, plus dhe 20 administratë, është një numër goxha i madh.
Deri tani ne i kemi përfshirë në objektin që jemi përfshirë dhe ne në ish-ndërtesën e krimeve të rënda, e rikonstruktuar me kushte shumë të mira, por që nuk mjafton nga pikëpamja e kapaciteteve. Për momentin po përballohet sepse Byroja Kombëtare e Hetimit ka aktualisht 28 punonjës, procedura e dytë e përzgjedhjes do të përfundojë në dhjetor dhe do të bëjnë një lloj trajnimi 4-mujor dhe do të duhet që ata 32 të tjerët duhet të akomodohen. Aty është totalisht e pamundur. Me strukturat tona ekonomike bëmë një ide sa mund të kushtojë një objekt i ri në vija të përgjithshme, në KLP u hodh ideja që mund të gjejmë një ndërtesë të gatshme dhe që mund ta marrim. KLP i ka dërguar një letër Këshillit të Ministrave dhe Ministrisë së Drejtësisë, i ka ngritur këtë shqetësim dhe i ka propozuar disa objekte aty afër që mund të vendosen në dispozicion”, u shpreh ai.
Sakaq, ai bëri me dije se duhet patjetër një fond që prokuroria të hap garën për shërbimet e policisë gjyqësore. Ai tha se deri tani janë parashikuar që të marrin pjesë 50 persona, por kur të përcaktohet numri real, mund të duhet një fond i konsiderueshëm për të përballuar këto shpenzimeve.
“Problemi i dytë ka të bëjë me shërbimet e policisë gjyqësore të Byrosë Kombëtare të Hetimit. Ligji parashikon që Byroja Kombëtare e Hetimit të ketë shërbimet e policisë gjyqësore. Që do të thotë duhet të ketë përfaqësues nga Policia e Shtetit të cilët rrinë në objektet ku ata janë, por paguhen nga Byroja Kombëtare e Hetimit. Kjo ka një problematikë në përcaktimin e numrit dhe të garës, ne kemi përcaktuar një numër prej 50 por na duhet fondi për të hapur garën.
Kjo bën që njëkohësisht të ketë fond në dispozicion dhe Policia e Shtetit dhe Prokuroria e Posaçme, por nuk e dimë kur do të përfundojë gara dhe në momentin që këta njerëz kur të mbarojnë afatin do të rikthehen përsëri në vendin ku ishin”, tha Kraja, ndërsa i kërkoi qeverisë që fondi për policinë gjyqësore duhet të jetë i ndarë nga fondi për Policinë e Shtetit.
Discussion about this post