Qeveria e Kosovës ka miratuar Projektligjin e Buxhetit për vitin 2022 me vlerën totale 2 miliardë e 748 milionë euro. Bie në sy se për herë të parë 100 milionë euro do të shkojnë për ushtrinë e Kosovës.
“Ushtrinë e kemi projektin tonë madhor dhe për herë të parë kemi ndarë mbi 100 milionë euro ose 1.3% të Bruto Produktit Vendor. Synimi ynë është që brenda mandatit ta sjellim në 2 për qind të Bruto Prodhimit Vendor, aq sa e kërkon standardi i NATO-s”, pohoi Kurti.
Ndër të tjera ai ka pohuar se do të bëhet ndërtimi i 50 çerdheve në gjithë vendin, gjithashtu dhe ndërtimi i rrugës Prizren-Tetovë.
“Sot jam takuar me ministrin e Financave, me të cilin e kemi shqyrtuar edhe njëherë buxhetin final. Me këtë buxhet ne do të fillojmë ndërtimin e 50 çerdheve në tërë vendin. Me këtë buxhet do të nisim rrugën Prizren-Tetovë. Për herë të parë kemi buxhetuar mbështetje për Luginën e Preshevës në shumë prej 2 milionë euro. Këto e shumë investime të tjera janë bërë të mundura me vetëm shtatë muaj qeverisje të mirë”, tha ndër të tjera kryeministri.
Për skemën e punësimit të të rinjve do të jepen 20 mln euro, ndërkohë që me 70 milionë euro të miratuara në buxhet do të rriten investimet në bujqësi.
