Deputetja demokrate, Dhurata Çupi ka mohuar akuzat e kolegut të saj, Oerd Bylykbashit, për një pazar me kryeministrin Edi Rama. Në një postim në rrjetet sociale, Çupi deklaron se as nuk ka pasur dhe as nuk do të ketë ndonjëherë pazar në kurriz të demokratëve.
Sipas Çupit, deputetët e grupit të Berishës kanë refuzuar që të bashkëpunojnë me të sa i takon Reformës Territoriale, edhe pse duhet thënë se ata u lanë jashtë nga komisionet, pikërisht nga Enkelejd Alibeaj.
“Keqardhje për kolegët që keqpërdorin pozitat e tyre për të sulmuar pjesën tjetër. Kur të na thonë si i shitën interesat e PD tek PS për reformën e fundit zgjedhore, mund të nisin dhe të bëjnë moral. Të paraqesësh punën e dikujt tjetër si gjetje, për të shtuar pak bashki, pa ndonjë përfitim të rëndësishëm për qytetarët, nuk është ide. Është një përpjekje për pazar me PS për t’u dukur prapë si i rëndësishëm. As demokratët, as shqiptarët e tjerë nuk kanë nevojë për këtë teatër të shëmtuar. Në komision përfaqësoj me integritet PD-në dhe këtë nuk mundet ta mohojë dot askush. I kam ftuar kolegët te bashkëpunojmë, por kanë refuzuar. E sa për pazar, jo vetëm që nuk ka, por nuk do të lejojmë as të ketë asnjëherë. Këtë ta dinë mirë ata që në vend që të bashkojnë forcat për të ndryshuar ndarjen territoriale se është një nevojë për shqiptarët, e kanë mendjen tek pazaret”, tha deputetja.
Discussion about this post