Partia Demokratike do të përgatisë një paketë ligjore për dekomunistizimin e shoqërisë, pas ngjarjes së djeshme, ku deputeti i PS, Bujar Çela uroi Pavarësinë me foton e diktatorit Enver Hoxha.
Në një konferencë për mediat, deputeti Enkeljed Alibeaj e cilësoi si urgjente dhe të nevojshme këtë paketë ligjore, ndërsa shtoi se do të kërkojë në Këshillin e Etikës marrjen e masave ndaj deputetit socialist.
“Evokimi i figurës të diktatorit nga një ligjvënës nuk është thjeshtë shkelja e Kodit të Sjelljes, por më tepër, nevojën për të bërë një orë e më parë, urgjente dekomunistizimin e shoqërisë shqiptare. Në emër dhe të kolegëve do të kërkojmë në Këshillin e Etikës së parlamentit marrjen e masave ndaj deputetit, si një detyrim moral më tepër. Ajo që unë dhe kolegët i kemi propozuar kryetarit, është që PD të paraqesë një paketë të plotë ligjore për dekomunistizimin e shoqërisë shqiptare. Janë bërë shumë përpjekje, por jemi prapa në këtë situatë ku nuk është arritur një rezultat konkret”, tha Alibeaj.
Sipas Alibeajt, kjo paketë do të ketë në fokus dekomunistizimin dhe shpërblimin e të dënuarve politikë që janë konsideruar si disidentë në kohën e komunizmit.
Discussion about this post