Kur na ndajnë edhe pak kohë nga mbajtja e zgjedhjeve parlamentare të vitit 2025, mbetet ende e paqartë se në cilat qarqe do të aplikohet votimi dhe numërimi elektronik.
Kryekomisioneri Shtetëror i Zgjedhjeve, Ilirjan Celibashi në një konferencë për mediet tha se është e pamundur që ky proces të shtrihet në tre qarqe, Tiranë, Durrës dhe Elbasan, pavarësisht kërkesës së subjekteve politike.
Sa iu përket rezervave të shprehura nga Partia Demokratike në lidhje me votimin elektronik, Celibashi tha se pajisjet e votimit elektronik janë 100% të sigurta.
“Ne prej shumë kohësh u kemi dërguar të gjitha partive politike kërkesën për të shprehur interes për votimin elektronik. Gjithkush e di që kemi propozuar që të zhvillohej në 5 qarqe. Në komunikimin e fundit propozuam qarkun e Elbasanit dhe Durrësit për votimin elektronik duke konsideruar që Elbasani ka një eksperiencë dhe Durrësi është mjaft afër me Tiranën dhe i krijon KQZ mundësi më të mirë për ta administruar. Kemi marrë përgjigje nga partitë, të gjithë pa përjashtim rekomandojnë të shtohet Tirana, dikush ka sugjeruar vetëm Tiranën, nuk është vetëm PS. Thuajse të gjitha. Përjashto PD që nuk konsideron asnjë njësi zgjedhore për zhvillimin e votimit elektronik. Thuajse të gjitha na kanë kërkuar të përfshihet edhe Tirana. Është e pamundur të bëhen tre qarqe. Kemi arsyetuar që o do zgjedhim dy qarqe me madhësinë e Tiranës, ose do duhet të zgjedhim vetëm Tiranën”, u shpreh Celibashi.
“I kemi marrë me seriozitet të gjitha komentet e PD në lidhje me votimin elektronik. Qëndron një prej atyre pretendimeve, që ka të bëjë me sjelljen e disa operatorëve në qendrat e votimit. Jemi në proces hetimi administrativ, e finalizojmë javës tjetër, për çfarë ka ndodhur me këtë kategori operatorësh. Pajisjet votimit dhe numërimit elektronik qëndrojnë aty të pahapura, në pritje të dikujt për të ardhur të bëjë çdo verifikim. E kemi bërë me dije, kush të dojë të vijë të bëjë verifikime në lidhje me pajisjet. Pajisjet e votimit elektronik janë 100% të sigurta dhe ofrojnë të gjitha garancitë për fshehtësinë e votës”, vijoi Celibashi.
“I kemi bërë me dije Kuvendit dhe kemi kërkuar buxhet potencialisht nëse do ecim me votimin elektronik vetëm për qarkun e Tiranës, që potencialisht përfshin edhe dy qarqet e tjera nëse do shtrojmë atje, dhe shkon një vlerë rreth 18.2 milionë euro”, u shpreh Celibashi.
Discussion about this post