Gjykata Kundër Korrupsionit dhe Krimit të Organizuar ka rrëzuar kërkesën e Fredi Belerit për përjashtimin e gjyqtares Irena Gjoka si dhe të gjithë trupës gjykuese.
Në seancën e zhvilluar sot për kryebashkiakun e zgjedhur të Himarës, Gjykata pranoi kërkesën e Prokurorisë që dëshmia e Arsen Ramës të bëhet me dyer të mbyllura.
Ndërkohë dëshmitë e tjera do të mbahen me dyer të hapura. Sipas prokurores Dorina Bejko, Arsen Ramës i është dëmtuar në Vlorë makina e tij dhe e bashkëjetueses dhe se rasti është referuar nga policia e Vlorës.
Lidhur me kërkesën e mbrojtjes, avokatët mbrojtës kërkuan që seanca te zhvillohet me dyer të hapura për shkak se deklarimet e këtij shtetasi kanë dalë në media. Gjithashtu mbrojtja shtoi se ai lëviz lirshëm dhe në asnjë moment nuk ështe kërcënuar. Ndërsa përsa i përket dëmtimit të makinës, avokatët mbrojtës shtuan se ajo është dëmtuar nga pronari i një servisi me të cilin Rama ka pasur konflikt. Pas dëgjimit të palëve, gjykata vendosi pranimin e Kërkesës së SPAK dhe vijimin e seancës me dyer të mbyllura.
Fredi Beleri u arrestua dy ditë para zgjedhjeve lokale të 14 majit. Prokuroria e akuzon Belerin për “korrupsion aktiv në zgjedhje”, duke pretenduar se ka provuar tej çdo dyshimi se ai i kishte ofruar një bashkëpunëtori të policisë 50 euro për çdo votë që mund të gjente në favor të tij si kryetar i Bashkisë së Himarës. Për të njëjtën vepër penale akuzohet edhe bashkëpunëtori i tij, Pandeli Kokaveshi.
Discussion about this post