Partia Demokratike ka risjellë sot në vëmendjen çështjen për dhënien e parkut të Butrintit me koncesione. Në një deklaratë për shtyp deputetja Ina Zhupa ka hedhur një sërë akuzash të reja, më së shumti ndaj koncesionarit. Me dokumentin e marrëveshjes në dorë ajo u shpreh se, ky është një akt antishqiptar i qeverisë Rama dhe nuk duhet t’i afrohet Butrintit dhe duhet shpallur si person i padëshirueshëm Richard Hodges.
“Të vendosësh antishqiptarë për të drejtuar punët që lidhen me historinë, identitetin, trashëgiminë dhe kulturën e shqiptarëve, përbën një akt paaftësie ose tradhtie. Ju ftoj të ndiqni një video të shkurtër të Richard Hodges, caktuar nga Qeveria e Edi Ramës si anëtar i bordit drejtues në koncensionin e Butrintit dhe drejtuesi shkencor i planit të menaxhimit të Butrintit. E dëgjuat se çfarë thotë Richard Hodges në leksionin e tij: Asnjë shqiptar nuk banonte në këto zona, duke përfshirë Sarandën, në 1913-ën. Butrinti iu dha padrejtësisht Shqipërisë nga Fuqitë e Mëdha“, thuhet në deklaratën e deputetes demokrate.
Më tutje ajo tregoi se Partia Demokrate dënon me forcë sundimin e interesave të ngushta klienteliste dhe financiare të klanit në pushtet, mbi interesat kombëtare. Ndërsa i ka bërë thirrje komunitetit shkencor, historianëve, arkeologëve dhe ekspertëve të trashëgimisë, të ngrenë zërin e protestës, si ndaj sharlatanizmit të zotit Hodges, edhe ndaj turpit dhe tradhtisë së ministrisë së Kulturës Elva Margariti dhe padronit të saj Edi Rama.
Discussion about this post