GJKKO pranoi sot kërkesën e Fatmir mediut, ish-ministër i Mbrojtjes, i cili hoqi dorë nga gjykimi i shkurtuar lidhur me çështjen Gërdeci.
Gjithashtu mbrojtësit ligjorë të Mediut kërkuan thirrjen e 90 dëshmitarëve, ndërsa në listë përfshihen gjeneralë, ish-ministra të Mbrojtjes , si dhe ish-zyrtarë të lartë të Mbrojtjes së SHBA.
Gjithashtu në listë janë dhe emrat e ish ministrave të kabinetit qeveritar të Berishës, ish sekretari i Përgjithshëm i Këshillit të Ministrave, Myqerem Tafaj, ish-kreu i SHISH, Bahri Shaqiri, por dhe ish ministrja e Mbrojtjes Mimi Kodheli.
Gjithashtu kërkohet të kryhet dhe një eksperiment me anë të së cilës kërkon të vërtetojë se nuk kemi të bëjmë me një shpërthim aksidental, por të qëllimshëm.
Avokatët e Mediut kërkojnë ripyetjen e ekspertëve të ngarkuar nga prokuroria në fazën e hetimit me kryerjen e eksperimentit për përcaktimin e shkakut të zjarrit në repartin e demontimit të municioneve në Gërdec. Gjykata është tërhequr për vendim nëse do të pranojë listën e 90 dëshmitarëve dhe nëse do të pranojë kërkesën e tij për tu tërhequr nga gjykimi i shkurtuar.
Ish-ministri i Mbrojtjes, Fatmir Mediu akuzohet për shpërdorim detyre në lidhje me procesin e çmilitarizimit dhe çmontimit të municioneve që është zhvilluar në ambientet e ish “Brigatës së Tankeve”, në fshatin Gërdec, në bashkëpunim me funksionarë të tjerë të Ministrisë së Mbrojtjes si dhe persona që kanë pasur cilësinë e ushtarakut kuadër komandues, ka nxjerrë disa akte nënligjore në kundërshtim me ligjin. Sipas SPAK, Mediu ka dëmtuar interesat e shtetit dhe ka favorizuar 2 kompanitë, ‘SAC’ dhe ‘Albademil’. Për këtë çështje ai akuzohet për “shpërdorim detyre” referuar Kodit Penal dhe “Shpërdorim i detyrës” në bashkëpunim me subjekt ushtarak-kuadër komandues.
Discussion about this post