Barcelona është në tension, Alexander Ceferin dhe UEFA nuk fshihen më. Presidenti i befasoi të gjithë të hënën, duke e përshkruar atë që ndodhi rreth klubit katalanas në “çështjen Negreira”, si një nga situatat më të rënda që ai ka njohur që kur i është futur botës së futbollit.
Ai e thotë këtë në javën kur UEFA mban kongresin e saj dhe ai do të zgjidhet president me aklamacion. Fjalët e tij ende jehojnë në të gjithë Lisbonën. Ceferin ka bërë që Barcelona dhe “çështja Negreira” të bëhen temë kryesore e kongresit.
Me hapjen e dosjes dy javë më parë, UEFA e bëri të qartë, se të gjitha indikacionet dhe provat që dilnin përditë, tregonin për një situatë jashtë kontrollit dhe shumë larg ligjshmërisë. Fjalët e presidentit nënkuptojnë edhe mundësinë në rritje për ta parë Barcelonën jashtë garave evropiane.
Pse ka folur Ceferin dy ditë para Kongresit në të cilin do të rizgjedhet? UEFA nuk dëshiron të humbasë kohë. Ajo që është intuituar do të duhet të demonstrohet nga inspektorët Jean Samuel Leuba dhe Mirjam Koller, pasi Nyon dëshiron që procesi të jetë i shpejtë që kur të vijë muaji qershor të merret një vendim në lidhje me pranueshmërinë e Barcelonës për të marrë pjesë në Champions League e ardhshme, apo jo.
“Nëse UEFA hidhet në pishinë në këtë mënyrë, është se atje ka ujë”, thonë specialistët e kësaj teme. Kujtojmë se kjo mundësi e pranimit ose jo e Barcelonës është vetëm për një sezon.
Procesi administrativ dhe një sanksion më i gjerë do të shkonin paralelisht me procesin gjyqësor, por kjo do të marrë kohë, prandaj dhe zelli me të cilin po vepron UEFA. Ceferin nuk dëshiron në asnjë rrethanë që konkurrenca të ketë as hijen më të vogël dyshimi.
UEFA nuk dëshiron që procesi të zvarritet, pasi e di që Barcelona do të shkojë fillimisht në Gjykatën e Apelit të UEFA-s dhe më pas në CAS, në kërkim të uljes së sanksionit të mundshëm ose gjetjes së një mase parandaluese që i lejon asaj të konkurrojë në sezonin 2023-24.
Ndëshkimi apo sanksioni i mundshëm do të merret nga një komision i pavarur, siç e ka bërë të qartë Ceferin, por mesazhet që po merr klubi katalanas dhe fjalët e vetë presidentit e bëjnë të qartë se situata është shumë e komplikuar.
Discussion about this post