Kryeministri Edi Rama ka reaguar sërish lidhur me paralajmërimin e pedagogëve për të hyrë në grevë urie ditën e sotme, nëse kërkesat e tyre nuk plotësohen.
Në një takim në kryeqytet, Rama akuzon kreun e sindikatës, Sandër Kovaci se ka marrë urdhër nga Sali Berisha për t’i dhënë ultimatum qeverisë. Gjithashtu kryeministri nuk ka nguruar t’i fyejë duke i konsideruar si njerëz pa fe dhe pa flamur.
“Jeni këtu për të kremtuar një dëshmor, një mesazh kuptimplotë të dikujt që dje dha jetën për atdheun, ndërkohë sot në kushte të vështira, një çetë, një pakicë nën drejtimin e një SHIK-si i cili ka uzurpuar sindikatën e ashtuquajtur të pedagogëve del me ultimatum se nëse nuk rriten rrogat hyjnë në grevë urie. Në grevë urie hyjnë njerëzit pa fe, pa flamur! Nuk bëjnë prindërit e këtyre njerëzve grevë për rroga që me siguri i kanë pagat shumë më të ulëta. Luftohet për të drejta themelore, jo për rroga, rritje më të madhe të rrogave në këto kushte e kanë pasur pikërisht pedagogët, nuk ua rritëm mësuesve që kanë një punë shumë më të vështirë, se këta që kanë paturpësinë të dalin në media. Si mundet një misionar i arsimit të dalë ashtu? Dalin e thonë nuk ia vlen të jesh pedagog, nuk mund të jetë më pedagog! Edhe një herë e përsëris, shumica e pedagogëve nuk janë këta, se përndryshe do të ishte alarm. Më vjen keq që u detyrova të flas për këtë. Shiksi që u shërben rublave ruse jo atdheut, ndryshe nga djali emrin e të cilit do të mbajë kjo shkollë”, tha Rama.
Kreu i sindikatës së pedagogëve, Sandër Kovaçi u shpreh se afati i fundit që do të pritet përgjigjja e qeverisë do të jetë dita e sotme 16:00. Ai tha se nëse përgjigjja do të jetë negative, ose nuk do të ketë asnjë reagim, atëherë prej ditës së sotme rreth 10 pedagogë janë gati për të hyrë në grevë urie.
Discussion about this post