Ministria e Arsimit vendosi ta shtyjë me një javë nisjen e vitit të ri akademik, që fillon në 18 tetor, për t’iu dhënë edhe një javë kohë për t’u vaksinuar studentëve. Por, me sa duket ky vendim nuk po jep efekt, sepse një pjesë e madhe e studentëve nuk janë vaksinuar dhe as nuk kanë shfaqur interes.
Gjatë një interviste televizive, Fatbardh Sallaku, Rektor Universiteti Bujqësor i Tiranës tregoi se vetëm 15% e studentëve do të vaksinohen. Ai tha se do mundohen që të mos paralizojnë asnjë student që nuk vaksinohet, por do përdorin skemën ku do kërkojnë çdo javë test për covidin.
Gjithsesi, ai iu bëri thirrje studentëve të nxitojnë të vaksinohen.
“Stafi akademik i Universitetit Bujqësor të Tiranës dhe besoj edhe i universiteteve të tjera është i vaksinuar mbi masën 90%, përfshirë këtu edhe stafin akademik ndihmës dhe stafin administrativ. Për sa i përket numrit të studentëve, ne kemi një shifër të përafërt që është rreth 15 % të vaksinuar deri më tani nga të dhënat që japin sekretaritë.
Në Universitetin Bujqësor të Tiranës studiojnë aktualisht 5500 studentë në të gjitha ciklet dhe këtë vit akademik pritet të nisin studimet 1500 studentë në vitin e parë. Më shumë sesa frikës apo skepticizmit për t’u vaksinuar unë do t’ja lija kohës, sepse ka qenë periudhë pushimesh dhe provimesh. Por unë besoj shumë që kjo javë, ditët në vazhdim do të shërbejnë që studentët t’i kthehen procesit të vaksinimit, pasi është në të mirën e të gjithëve.
Ne jemi të detyruar të zbatojmë urdhrat e Ministrisë së Arsimit dhe të Ministrisë së Shëndetësisë që në ambientet e çdo universiteti do ët pranohen vetëm ata që janë vaksinuar, që e vërtetojnë me certifikatën e vaksinimit, ose testin PCR”, tha ai.
Sipas tij, është mirë që në fillimin e viti të ri akademik të jenë të vaksinuar.
