Prej disa kohësh Partia Demokratike ka kërkuar që të ndryshojë reformën territoriale, duke e quajtur atë aktualen si një tekë të Ramës për kapjen e shtetit. PD ka deklaruar se kanë filluar masat që kjo kërkesë e tyre të vihet në zbatim, por më shumë në lidhje më këtë proces ka folur sot nënkryetari i PD, Oerd Bylykbashi. Në një intervistë për OraNews ai është shprehur se, PD do të kërkojë që ndarja e re territoriale të mos hyjë në fuqi për zgjedhjet e ardhshme vendore, pavarësisht objektivit të mazhorancës. Gjithsesi, ai tha se PD nuk do të lejojë që në zgjidhjet e radhës Rama të vërë në zbatim skemat e tij abuzuese dhe korruptive.
“Qasja e PS-së është gjithmonë kjo. Ta bëjë shpejt në mënyrë që të bëjë trukun e radhës për të fituar elektoralisht. Ne jemi të angazhuar për ta ndaluar këtë”, u shpreh ai.
Bylykbashi e le të nënkuptohet që nën monitorimin e PD nuk janë vetëm “kurthet” politike të PS por edhe joshja e deputetëve demokratë nga ofertat e Ramës. “Për të hequr qarkun e futur rajonin që është diçka e mirë por jo për arsye kompromisi dhe pazari politik. Pra futja e rajoneve duke hyrë në Kushtetutë të ndryshohet më pas sistemi zgjedhor për të bërë atë që do Rama, futjen e primit. Nuk mund të jetë një shkëmbim për interes të vogël politik, përndryshe vritet reforma territoriale”, ka thënë ai.
Në kushtet e Shqipërisë, 61 bashki janë të pamjaftueshme, sipas PD, për t’i shërbyer qytetarëve. Bylykbashi tha se do të propozojë shtimin e njësive vendore, me optimizmin që PS do t’ia pranojë. 30 shtatori është afati i fundit për punën e komisionit të reformës territoriale, dhe nëse do të pranohet propozimi i PD, atëherë puna e deputetëve do ë vijojë pas zgjedhjeve vendore.
Discussion about this post