Ish-drejtori artistik i Moncler, Francesco Ragazzi nuk kishte në plan që të krijonte një markë të vetën. Fillimisht, projekti i tij Palm Angels ishte thjesht një libër që vendoset nëpër kafene, ku paraqiteshin fotografi me skena skejtbordi në Los Angeles. Megjithatë duket se patinat dhe lidhja me vendlindjen e tij, Italinë, e frymëzoi Ragazzi-n për të krijuar Palm Angeles, një markë që është ndër të preferuarat e emrave me ndikim si A$AP Rocky apo Joe Jonas.
“Unë kam nevojë të riinterpretoj kulturën amerikane me këndvështrimin tim. Kjo është arsyeja pse kur realizova librin me fotografi, bëra një reportazh për patinatorët në Venice Beach, Los Angeles, por në mënyrën time si i huaj.
FRANCESCO RAGAZZI
Linja ime është përfaqësimi i kulturës amerikane si i huaj. Emri Palm Angels vjen nga fotografia e parë që bëra për librin tim. Ishte një djalë flokëverdhë dhe po kërcente në ajër me patinën e tij në palmat e Kalifornisë. Mendova, ja tek janë palmat, ai duket si engjëll, kështu që ‘Palm Angels’.” – tha ai në një intervistë për Coveteur.
Po në të njëjtën intervistë, Ragazzi u shpreh se të jetuarit mes SHBA-së dhe Italisë ka ndikuar që të shfaqë kuriozitet për të bërë bashkë dy kulturat. Ai u shpreh se marka lindi krejt rastësisht, pas bashkëpunimit me Pharrel Williams.
“Doja të isha fotograf mode – fotografia ka qenë gjithnjë pasioni im. Herën e parë kur shkova në Los Angeles kisha aparatin tim të vogël dhe u dashurova me qytetin. Kështu lindi me pak fjalë. Pastaj e prezantova projektin te Rizzoli [botues] dhe Pharrell Williams me të cilin po punoja. Ai ka qenë patinator kështu që shkroi parathënien e librit. Kjo ndodhi në vitin 2014. Pastaj një mik më tha, ‘pse nuk nis një linjë tënden? Do të të mbështes’. Kështu nisi.”
Palm Angels u themelua në vitin 2015. Marka e ka bazën në Milano, megjithëse nuk mund të quhet një markë italiane, pasi frymëzimi i saj është kultura e skejtbordit në Los Angeles. Nga ana tjetër, marka nuk është as amerikane, pasi Ragazzi e sheh kulturën amerikane në këndvështrimin e tij, si një i huaj. Në ditët e sotme, Palm Angels është një nga markat e preferuarave të reperëve dhe yjeve të NBA. Palm Angels ka krijuar një terren të sigurt në industrinë e modës, sidomos për njerëzit që nuk shohin ndonjë ndryshim mes veshjeve luksozeve dhe atyre të përditshmërisë.
