Ambasadorja e SHBA-së, Yuri Kim, në një postim të bërë në Twitter, shkruan se Reforma në Drejtësi po fillon të prodhojë gjithnjë e më shumë rezultate dhe se kundërshtarët po shtojnë përpjekjet për të minuar elementët kryesorë, përfshirë verifikimin. Ajo thotë se ata që angazhohen në kërcënime, frikësim, shpifje, nxitje korruptive duhet të ndalojnë. Sipas saj, lufta kundër korrupsionit është një interes thelbësor i sigurisë kombëtare të Shteteve të Bashkuara.
“Ndërsa Reforma në Drejtësi po fillon të prodhojë gjithnjë e më shumë rezultate, kundërshtarët po shtojnë përpjekjet për të minuar elementët kryesorë, përfshirë verifikimin. Ata që angazhohen në kërcënime, frikësim, shpifje, nxitje korruptive duhet të ndalojnë. Veprimet tuaja nuk janë aq të fshehura sa mendoni. Presidenti Biden e bëri të qartë në Studimin e Sigurisë Kombëtare në Memorandumin e 3 qershorit 2021 që lufta kundër korrupsionit është një interes thelbësor i sigurisë kombëtare të Shteteve të Bashkuara. SHBA do të vazhdojë të mbështesë fuqishëm zbatimin e reformës në drejtësi në Shqipëri” – shkruan Kim në Twitter.
Deklarata e Yuri Kim ka ardhur në një kohë kur përplasja mes palëve politike në vend ka përfshirë jo pak herë edhe SPAK-un. Edhe situata në PD është një rast tjetër, ku Berisha është një nga personat që ka shprehur rezerva të shumta për rezultatet e drejtësisë dhe jo pak herë është lexuar si presion ndaj prokurorëve që mos të nisin hetim ndaj tij edhe për shkak të “non gratës” që ka. Edhe Presidenti Ilir Meta është një nga personat që është shprehur skeptik për reformën në drejtësi. Ndërsa kryeministri Edi Rama i është drejtuar SPAK-ut në Kongresin e Partisë Socialiste, ku tha se po godet vetëm nga krahu i të majtëve, deklaratë kjo që u lexua nga analistët si kërcënim për prokurorrët e SPAK.
Discussion about this post