Kreu i Këshillit Kombëtar, dhe deputeti i PD, Edi Paloka iu është përgjigjur interesit të gazetarëve se çfarë do të ndodhë nëse lideri i opozitës, Lulzim Basha nuk njeh mbledhjen e Kuvendit Kombëtar.
Paloka u shpreh se detyra e tij është të dorëzojë firmat në Kuvend dhe t’i bindet shumicës, ndërsa i konsideron si “cic mice” deklaratat se duhet njoftuar data apo sekretari i Përgjithshëm për mbledhjen.
“Unë këtu jam si kryetar i Këshillit, pala që ka mbledhur firmat më ka kërkuar të dorëzoj këto firma. Ky është një Kuvend i jashtëzakonshëm. Në këtë rast nëse nuk u përgjigjen detyrimeve statuore, ne jemi të detyruar t’u bindemi vullnetit të shumicës se nuk kemi më ¼, por shumicën e Kuvendit me këto firma. Nëse dikush nuk e zbaton këtë vendim, atëherë kanë detyrimin firmëtarët që të vazhdojnë me procedurat. Këto janë cic mice që vetëm PD nuk i shkojnë. Nëse doni mendimin tim, kur 4200 delegatë kërkojnë të zgjidhin një krizë, sepse ne jemi në krizë e pranojmë apo jo, kjo gjëja që a duhet njoftuar data para apo mbrapa janë vetëm cic mice. Nuk zgjidhet kjo krizë duke u marrë me procedura të kota. Kemi një realitet, ne jemi në krizë, mendoj se të gjithë duhet t’i përgjigjemi kësaj situate”, tha Paloka.
Deputeti demokrat ka ftuar në zyrën e tij gazetarët për të bërë verifikimin e firmave, duke iu kërkuar të mos publikojnë emrat për arsye personale.
Discussion about this post