Pas vrasjes së gruas 35-vjeçare shtatzënë Hamide Magashi nga bashkëshorti i saj Sokol Halili në Kosovë, presidentja Vjosa Osmani ka thirrur një mbledhje urgjente të Këshillit për Demokraci dhe të Drejtat e Njeriut. Në takim do të marri pjesë të gjithë krerët e institucioneve të rëndësishme në vend.
Sipas Osmanit, do të merren masa konkrete për parandalimin e dukurisë së vrasjes së vajzave dhe grave.
Në një deklarim për RTK-në, Osmani ka thënë se si shtet dhe shoqëri, Kosova është para një sfide serioze. Sipas saj femicidi urgjentisht duhet të ndalet dhe nuk duhet të tolerohet.
“Në këtë takim përveç liderëve institucionalë do të marrin pjesë edhe udhëheqësit e institucioneve të drejtësisë, të sigurisë, përfaqësues të shoqërisë civile, të institucioneve të pavarura. Në agjendë janë dy pika konkrete: E para, secili institucion të jetë në inputin e vet lidhur me mangësitë që ekzistojnë në sistemin tonë për mbrojtjen e jetës së vajzave dhe grave dhe e dyta do të dalim me përfundime dhe konkluzione konkrete se si të parandalojmë këto akte të dhunës dhe këtë femicid sa më urgjentisht që të jetë e mundur”, ka theksuar Osmani.
Ajo ka thënë se pret nga institucionet që në këtë takim të shkojnë me listë të veprimeve konkrete që duhet të ndermirën për ta parandaluar vrasjen e grave.
“Shpresoj shumë që secili nga institucionet e Kosovës do të vijë me një listë veprimesh konkrete të cilat janë nën ombrellën e Këshillit për Demokraci dhe të Drejta të Njeriut dhe i cili do të mbikëqyrë zbatimin e tyre do të shtyhen përpara, duke kuptuar seriozitetin e kësaj situata jashtëzakonisht tronditëse për gjithë shoqërinë dhe shtetin tonë. Si shtet dhe shoqëri jemi para një sfide serioze, sepse femicidi urgjentisht duhet të ndalet dhe nuk duhet të tolerohet”, ka deklaruar Osmani.
Shtatzëna dyshohet se të mërkurën mbrëma është qëlluar për vdekje nga bashkëshorti i saj, me të cilin ka qenë në proces të ndarjes. Ngjarja ka ndodhur para Klinikës së Gjinekologjisë. Ajo do të varroset sot, në varrezat e fshatit Lllugaxhi. I dyshuari për vrasjen e saj ende është në arrati.
Discussion about this post