Shefi i Inspektoriatit të Mjedisit në Elbasan, Ismail Dybeli ka dhënë detaje në lidhje me punën e Inceneratorit të Elbasanit i cili u sekuestrua një ditë më parë nga SPAK, pas arrestimit të ish-ministrit Lefter Koka.
Në një deklaratë për mediat, Dybeli tha se puna për grumbullimin e mbetjeve ka vijuar normalisht dhe deri më tani nuk ka asnjë informacion në lidhje me bllokimin e punës. Sipas tij bllokimi i punës në incenerator do të bëhet vetëm në rast remorti.
“Puna dhe sot deri në 4 të mëngjesit ka vijuar normalisht, edhe pse në media qarkullon ky problem. Inceneratori vijon normalisht punën dhe ai fiket vetëm në rast remorti. Nuk na është thënë se do të kemi fikje të tij, ne vijojmë të punojmë normalisht. Bashkitë e tjera të qarkut e kanë marrë informacionin që të gjithë mbetjet do të kalojnë tek incineratori i Elbasanit, kemi informacion që do të kalojë në varësi të bashkisë me administratën e vet”, ka thënë Dybeli.
Sekuestrimi i inceneratorit u bë nga SPAK pas arrestimit të ish-ministrit Lefter Kokës, i cili në cilësinë e ministrit të Mjedisit ka shkelur procedurat për dhënien e licencës dhe miratimin e vijimit të ndërtimit të objektit, ndërsa Klodjan Zoto dhe Stela Gugallja akuzohen se kanë kryer transaksione të rreme me paratë e marra nga buxheti i shtetit për llogari të kontratës koncesionare. Po ashtu ata i kanë dhënë ryshfet ish- Ministrit në mënyrë që ky i fundit të lejonte ndërtimin e inceneratorit.
Discussion about this post