Një nga strategët e fushatës së rikthimit të Donald Trump si President i 47-të i ShBA-së, Chris LaCivitas, tashmë drejtues i fushatës së Partisë Demokratike, ka reaguar në lidhje me shkrimin e medias konservatore në Amerikë, “The Federalist”, e cila paralajmëronte fitoren e liderit të opozitës në Shqipëri, Sali Berisha, në zgjedhjet e 11 majit.
“Zgjedhjet në Shqipëri mund të krijojnë një pikëmbështetje Pro-Amerikane në Europë”, shkruan në X LaCivita.
Kujtojmë se Chris LaCivita e sulmoi ashpër Edi Ramën gjatë prezantimit të tij si drejtues i fushatës së PD-së në zgjedhjet e 11 majit, duke e quajtur kryeministrin si kukull të Soros.
Albania’s Elections Could Install Pro-America Beachhead In Europe https://t.co/7P4B4oGk6L
— Chris LaCivita (@ChrisLaCivita) March 6, 2025
Çfarë shkruan media amerikane
Artikulli në median amerikane trajton zgjedhjet parlamentare në Shqipëri dhe rëndësinë e tyre në skenën politike europiane.
Autoritetet ndërkombëtare dhe opozita shqetësohen për integritetin e zgjedhjeve, duke akuzuar qeverinë socialiste të Edi Ramës për manipulime, përdorim të burimeve shtetërore dhe lidhje me krimin e organizuar për të siguruar një mandat të katërt. Një çështje kyçe është ndikimi i George Soros dhe Fondacionit të tij “Shoqëria e Hapur” në reformën e drejtësisë, e cila ka krijuar një klimë politike të tensionuar dhe ka shtyrë shumë të rinj të largohen nga vendi.
Ish-kryeministri Sali Berisha, lider i opozitës, ka qenë subjekt i ndalimeve dhe akuzave për korrupsion, të cilat ai dhe mbështetësit e tij i cilësojnë si të motivuara politikisht. Pas një periudhe arresti shtëpiak prej 11 muajsh, Gjykata e Lartë e Shqipërisë i hoqi akuzat kundër tij në dhjetor 2024.
Berisha dhe opozita e shohin rikthimin e Donald Trump në Shtëpinë e Bardhë si një mundësi për Shqipërinë dhe rajonin, duke besuar se kjo do t’i japë fund ndikimit të Soros dhe censurës. Ai gjithashtu akuzon Soros për mbështetjen e projekteve për ndryshime kufijsh në Ballkan, të cilat sipas tij përkojnë me politikat e Rusisë.
Me frustrimin e madh të qytetarëve ndaj qeverisë aktuale dhe mundësinë e votimit nga diaspora për herë të parë, shanset e opozitës për fitore janë të larta. Megjithatë, shqetësimet për manipulime zgjedhore mbeten të mëdha.
Discussion about this post